தமிழ்நாடு வான் காய் ஷிடோ ரியு கராத்தே சங்கம் சாா்பில் கன்னியாகுமரியில் சனிக்கிழமை நடைபெற்ற மாநில அளவிலான கராத்தே போட்டியில் திருநெல்வேலி மாவட்ட அணி சாம்பியன் பட்டம் பெற்றது.

இப்போட்டியில் தமிழகம் முழுவதும் இருந்து 5 வயது முதல் 25 வயது வரையிலான 400 க்கும் மேற்பட்ட வீரா்கள் பங்கேற்றனா். போட்டி தொடக்க விழாவுக்கு அமைப்பாளா் ஹெச்.ராஜ் தலைமை வகித்தாா். ஆசிய கராத்தே கூட்டமைப்பு நடுவா் சி.அழகப்பன் முன்னிலை வகித்தாா். கன்னியாகுமரி டி.எஸ்.பி. ஏ.ராஜா போட்டியை தொடங்கி வைத்தாா்.

இதில், திருநெல்வேலி மாவட்ட அணி சாம்பியன் பட்டம் பெற்றது. தூத்துக்குடி மாவட்ட அணி இரண்டாவது இடமும், கன்னியாகுமரி மாவட்ட அணி மூன்றாவது இடமும் பெற்றன.

கன்னியாகுமரி விவேகானந்தா கேந்திர வித்யாலயா பள்ளி முதல்வா் எஸ்.ஆபிரகாம் லிங்கம், கன்னியாகுமரி புனித கலாசன்ஸ் பள்ளி துணை முதல்வா் ஜின் ஜோசப், அகஸ்தீசுவரம் ஞானதீபம் மெட்ரிக் மேல்நிலைப்பள்ளி முதல்வா் ஜே.ஐடா ஜான்சி ஆகியோா் வெற்றி பெற்ற அணியினருக்கு பரிசுகளை வழங்கினா். கன்னியாகுமரி கே.கே.ஆா். அகாதெமி ஒருங்கிணைப்பாளா் எஸ்.எம்.வினிஷா நன்றி கூறினாா்.