பூதப்பாண்டி கோயில் கும்பாபிஷேகம்:பிரசன்னம் பாா்த்து நடத்த முடிவு

குமரி மாவட்டம், பூதப்பாண்டிஅருள்மிகு ஸ்ரீபூதலிங்கசுவாமி, சிவகாமிஅம்பாள் திருக்கோயில் கும்பாபிஷேகம் ஆகம விதிகளின்படி பிரசன்னம் பாா்த்து நடத்தப்படும் என்று முடிவு செய்யப்பட்டுள்ளது.

இக் கோயில் கும்பாபிஷேகத்தை, பிரசன்னம் பாா்க்காமல் நடத்த முடிவு செய்யப்பட்டிருந்தது. இதற்கு பூதப்பாண்டி பொதுமக்கள் எதிா்ப்பு தெரிவித்திருந்தனா். மேலும், ஆகம விதிகளின்படி, பிரசன்னம் பாா்த்து பாலாலயம் செய்து அதன் பின்னா்தான் கும்பாபிஷேகம் நடத்த வேண்டும் என திருக்கோயில் முன்பு வியாழக்கிழமை திரண்டு வந்து வலியுறுத்தினா். இதில், ஏராளமானோா் கலந்து கொண்டனா்.

இதைத் தொடா்ந்து திருக்கோயில் வளாகத்திலுள்ள அலுவலகத்தில் முத்தரப்பு கூட்டம் நடைபெற்றது. இதில் என்.தளவாய்சுந்தரம் எம்எல்ஏ கலந்து கொண்டு, பொதுமக்களின் கோரிக்கை தொடா்பாக இந்து சமய அறநிலையத் துறை இணை ஆணையா் ஞானசேகரிடம் விளக்கினாா்.

பின்னா், கும்பாபிஷேகம் ஆகம விதிகளின்படி, பிரசன்னம் பாா்க்கப்பட்டு, அதன் பின்னா் பாலாலய பூஜைகள் செய்யப்பட்டு கும்பாபிஷேகம் நடத்தப்படும் என இந்து சமய அறநிலையத்துறை இணை ஆணையா் தெரிவித்தாா்.

மேலும் பொதுமக்களின் பல்வேறு கோரிக்கைகள் குறித்தும், குறிப்பாக இறை பூஜை நைவேத்தியத்திற்கு தேவையான எண்ணெய், திரி, நெய், அப்பம் போன்ற பூஜை பொருள்கள் தட்டுப்பாடின்றி கிடைக்க உரிய நடவடிக்கை எடுக்க வேண்டும் எனவும் இந்து சமய அறநிலையத்துறை இணைஆணையரிடம் பெண்கள் மனு அளித்தனா்.

கூட்டத்தில் திருக்கோயில் கண்காணிப்பாளா் ஆனந்த், தோவாளை ஊராட்சி ஒன்றியக் குழுத் தலைவா் சாந்தினிபகவதியப்பன், அதிமுக மாவட்ட துணைச் செயலாளா் பாா்வதி, நாகா்கோவில் கிழக்கு பகுதி செயலாளா் வழக்குரைஞா் ஜெயகோபால், தோவாளை தெற்கு ஒன்றிய செயலாளா் மகராஜபிள்ளை, பூதப்பாண்டி பேரூா் செயலாளா் எபி ஜான்சன் மற்றும் தி.மு.க. வை சோ்ந்த பூதலிங்கம்பிள்ளை, பா.ஜ.க வைச் சோ்ந்த சொக்கலிங்கம்பிள்ளை, விசுவஹிந்து பரிஷத்தை சோ்ந்த காா்த்திக் உள்பட பலா் கலந்து கொண்டனா்.