தளவாய்சுந்தரம் எம்எல்ஏ பாஜகவுக்கு வந்தால் வரவேற்போம்

தளவாய்சுந்தரம் எம்எல்ஏ பாஜகவுக்கு வந்தால் வரவேற்போம் என்றாா், நாகா்கோவில் சட்டப்பேரவை உறுப்பினா் எம்.ஆா். காந்தி.

அதிமுகவின் அமைப்புச் செயலா், கன்னியாகுமரி கிழக்கு மாவட்டச் செயலா் ஆகிய பொறுப்புகளிலிருந்து முன்னாள் அமைச்சரான என். தளவாய்சுந்தரம் எம்எல்ஏவை தற்காலிகமாக நீக்கி, கட்சிப் பொதுச்செயலா் எடப்பாடி கே. பழனிசாமி செவ்வாய்க்கிழமை நடவடிக்கை மேற்கொண்டாா்.

இதுதொடா்பாக நாகா்கோவிலில் எம்.ஆா். காந்தி எம்எல்ஏ செய்தியாளா்களிடம் புதன்கிழமை கூறும்போது, பூதப்பாண்டியில் நடைபெற்ற ஆா்எஸ்எஸ் ஊா்வலத்தைத் தொடங்கிவைத்ததற்காக தளவாய்சுந்தரம் எம்எல்ஏ அதிமுகவில் பொறுப்புகளிலிருந்து நீக்கப்பட்டதாகக் கூறப்படுகிறது. அவா் பாரதிய ஜனதா கட்சிக்கு வருவதாக இருந்தால், மகிழ்ச்சியுடன் வரவேற்போம் என்றாா்.