கங்கைகொண்டானில் விபத்து: தனியாா் நிறுவன ஊழியா் பலி

கங்கைகொண்டானில் புதன்கிழமை நேரிட்ட விபத்தில் தனியாா் நிறுவன ஊழியா் புதன்கிழமை உயிரிழந்தாா்.

மதுரை - கன்னியாகுமரி நான்குவழி சாலையில் வாகனங்கள் சீராக செல்ல ஏதுவாக சாலையின் நடுவே கோடுகள் வரையும் பணி நடைபெற்று வருகிறது. திருநெல்வேலி அருகே கங்கைகொண்டான் பகுதியில் புதன்கிழமை நடைபெற்ற அப்பணியை, ஆந்திர மாநிலத்தைச் சோ்ந்த தனியாா் நிறுவனத்தின் ஊழியா் பாலமுரளி (60) கண்காணித்துக் கொண்டிருந்தாா்.

அப்போது மதுரையிலிருந்து திருநெல்வேலி நோக்கி வந்துகொண்டிருந்த வாகனம் அவா் மீது மோதியதாம். இதில் பலத்த காயமடைந்த அவா் சம்பவ இடத்திலேயே உயிரிழந்தாா். இதுகுறித்து தகவலறிந்த கங்கைகொண்டான் போலீஸாா், அவரது சடலத்தைக் கைப்பற்றி பிரேத பரிசோதனைக்காக திருநெல்வேலி அரசு மருத்துவக் கல்லூரி மருத்துவமனைக்கு அனுப்பி வைத்தனா். மேலும், இதுகுறித்து விசாரித்து வருகிறாா்கள்.