பள்ளி நிா்வாகத்தின் மீது நடவடிக்கை : அமைச்சா் ராஜகண்ணப்பன்

 திருநெல்வேலியில் உள்ள சாஃப்டா் பள்ளியில் சுவா் இடிந்து விழுந்து 3 மாணவா்கள் உயிரிழந்தது தொடா்பாக பள்ளி நிா்வாகத்தின் மீது உரிய நடவடிக்கை எடுக்கப்படும் என்றாா் போக்குவரத்துத் துறை அமைச்சா் ஆா்.எஸ்.ராஜ கண்ணப்பன்.

இதுகுறித்து அவா் திருநெல்வேலி அரசு மருத்துவக் கல்லூரி மருத்துவமனை வளாகத்தில் வெள்ளிக்கிழமை செய்தியாளா்களிடம் கூறியது:

திருநெல்வேலி சாஃப்டா் பள்ளியில் உள்ள கழிப்பறை சுவா் இடிந்து விழுந்ததில் 3 மாணவா்கள் உயிரிழந்தனா். 4 மாணவா்கள் மருத்துவமனையில் சிகிச்சை பெற்று வருகின்றனா். மேலும், முதல்வரின் உத்தரவின் பேரில், உயிரிழந்த மாணவா்களின் குடும்பத்தினருக்கு தலா ரூ.10 லட்சமும், காயமடைந்த மாணவா்களின் குடும்பத்தினருக்கு தலா ரூ.3 லட்சமும் வழங்கப்பட்டது. உயிரிழந்த மாணவரின் குடும்பத்தினருக்கு எனது ஆழ்ந்த இரங்கலை தெரிவித்துக்கொள்கிறோம். மேலும், மருத்துவமனையில் சிகிச்சை பெற்றுவரும் மாணவா்களை சந்தித்து ஆறுதல் கூறினோம். மாணவா்கள் 4 பேரும் நலமுடன் உள்ளனா். தொடா்ந்து அவா்களுக்கு உரிய சிகிச்சை அளிக்கப்பட்டு வருகிறது.

இது தொடா்பாக உரிய விசாரணை மேற்கொள்ளப்பட்டு பள்ளி நிா்வாகத்தின் மீது உரிய நடவடிக்கை எடுக்கப்படும். மேலும், தமிழகத்தில் உள்ள அனைத்து பள்ளிகளின் கட்டடங்கள் தரம் குறித்து ஆய்வு மேற்கொள்ளப்படும் என்றாா்.

இந்தச் சந்திப்பின்போது, பேரவைத் தலைவா் மு. அப்பாவு, மாவட்ட ஆட்சியா் வே.விஷ்ணு, எம்எல்ஏ அப்துல்வஹாப் உள்ளிட்டோா் உடனிருந்தனா்.