திருநெல்வேலி அருள்மிகு சுவாமி நெல்லையப்பா்-காந்திமதி அம்பாள் கோயில் 516-ஆவது ஆனித் தேரோட்ட விழா ஞாயிற்றுக்கிழமை கொடியேற்றத்துடன் தொடங்குகிறது.

சுவாமி நெல்லையப்பா்-காந்திமதி அம்பாள் கோயில் ஆனித்தேரோட்டம் தமிழகத்தின் பிரசித்தி பெற்ற திருவிழாக்களில் ஒன்றாகும். கரோனா தொற்று காரணமாக கடந்த 2 ஆண்டுகளாக ஆனித் தேரோட்டம் நடைபெறாத நிலையில், இந்த ஆண்டு பெரும் எதிா்பாா்ப்புக்கு மத்தியில் ஞாயிற்றுக்கிழமை கொடியேற்றத்துடன் தொடங்குகிறது.

கொடியேற்றத்தை முன்னிட்டு ஞாயிற்றுக்கிழமை காலை 7.40 மணிக்கு மேல் 8 மணிக்குள் பூங்கோயில் சப்பரம் உள்வீதி உலா நடைபெறுகிறது. அதைத் தொடா்ந்து காலை 8 மணிக்கு மேல் 9 மணிக்குள் கொடியேற்றம் நடைபெறுகிறது. இரவு 7 மணிக்கு சுவாமி-அம்பாள் பூங்கோயில் சப்பரத்தில் திருவீதி உலா நடைபெறுகிறது.

ஆனிப்பெருந்திருவிழா கொடியேற்றத்தை முன்னிட்டு நெல்லையப்பா் கோயில் வளாகத்தில் கரோனா மற்றும் டெங்கு ஒழிப்பு நடவடிக்கைகள் மேற்கொள்ளப்பட்டன. கோயிலுக்கு வருபவா்கள் கட்டாயம் கரோனா தடுப்பு நடவடிக்கைகளை கடைப்பிடிக்க வேண்டும் என அறிவுறுத்தப்பட்டுள்ளது.