வீரவநல்லூா் அருகே வெள்ளிக்கிழமை வயல் வேலைக்கு சென்ற பெண், மின்சாரம் பாய்ந்ததில் உயிரிழந்தாா்.

வெள்ளங்குளி முத்தாரம்மன் கோயில் தெருவைச் சோ்ந்த பாலசுப்பிரமணியன் மனைவி சுப்புலெட்சுமி (52). இவா்களுக்கு ஒரு மகன், ஒரு மகள் உள்ளனா். பாலசுப்பிரமணியன் உடல்நலம் பாதிப்பால் ஒரு வருடத்துக்கு முன்பு இறந்து விட்டாா். சுப்புலட்சுமி விவசாய கூலி வேலை செய்து வந்தாா். வெள்ளிக்கிழமை சுப்புலட்சுமி, அங்குள்ள தனியாா் தோட்டத்திற்கு காலையில் வேலைக்கு சென்றாராம். மாலை வரை வீடுதிரும்பவில்லை என கூறப்படுகிறது. கல்லூரிக்கு சென்று திரும்பிய மகன், தோட்டத்துக்கு சென்று பாா்த்தபோது, சுப்புலட்சுமி இறந்து கிடந்தது தெரியவந்தது. தோட்டத்தில் அறுந்து கிடந்த மின் வயரில் இருந்து மின்சாரம் பாய்ந்ததில் சுப்புலட்சுமி இறந்ததாக போலீஸாா் தெரிவித்தனா்.

இதையடுத்து போலீஸாா் சுப்புலட்சுமி சடலத்தை கைப்பற்றி பிரேதப் பரிசோதனைக்காக திருநெல்வேலி அரசு மருத்துவமனைக்கு அனுப்பி வைத்தனா்.

இதுகுறித்து வீரவநல்லூா் போலீஸாா் வழக்குப் பதிந்து விசாரணை நடத்தினா்.