விபத்தில் பிஎஸ்எஃப் காவலா், விவசாயி உயிரிழப்பு

திருநெல்வேலி, கல்லிடைக்குறிச்சி ஆகிய பகுதிகளில் நடைபெற்ற விபத்துகளில் எல்லை பாதுகாப்பு படை (பிஎஸ்எஃப்) தலைமைக் காவலா், விவசாயி ஆகியோா் உயிரிழந்தனா்.

திருநெல்வேலியை அடுத்த நாராணம்மாள்புரம் பகுதியைச் சோ்ந்தவா் நடராஜன் (69). பாளையங்கோட்டையை அடுத்த கீழநத்தம் பகுதியைச் சோ்ந்தவா் மாயாண்டி (68). விவசாயம் செய்து வரும் இவா்கள் இருவரும் கடந்த 8-ஆம் தேதி பைக்கில் பாளையங்கோட்டை கேடிசி நகருக்கு நான்கு வழிச்சாலையில் சென்றுள்ளனா். ரஹ்மத் நகா் பகுதியில் வந்தபோது, அவ்வழியே வந்த அடையாளம் தெரியாத பைக் மோதியதில் நடராஜன், மாயாண்டி ஆகிய இருவரும் தூக்கி வீசப்பட்டனா். பலத்த காயமடைந்த அவா்களை அக்கம்பக்கத்தினா் மீட்டு, சிகிச்சைக்காக திருநெல்வேலி அரசு மருத்துவக் கல்லூரி மருத்துவமனைக்கு அனுப்பி வைத்தனா். அங்கு சிகிச்சை பலனின்றி, வியாழக்கிழமை காலையில் நடராஜன் உயிரிழந்தாா்.

இதுகுறித்து திருநெல்வேலி மாநகர போக்குவரத்து புலனாய்வு பிரிவு போலீஸாா் வழக்குப் பதிவு செய்து விசாரணை நடத்தி வருகின்றனா். மேலும், விபத்தை ஏற்படுத்திவிட்டு நிற்காமல் சென்ற பைக்கையும் தேடி வருகின்றனா்.

பாதுகாப்பு படை வீரா்: அம்பாசமுத்திரம் பண்ணை சங்கர அய்யா் நகரைச் சோ்ந்தவா் அருணாசலம் மகன் மாரியப்பன்(45). இவா் மிஸோரமில் எல்லை பாதுகாப்பு படையில் தலைமைக் காவலராக பணிபுரிந்து வந்தாா். கடந்த 9-ஆம் தேதி விடுமுறையில் ஊருக்கு வந்த மாரியப்பன், திருநெல்வேலி தாமிரவருணி போக்குவரத்து பணிமனையில் பணிபுரியும் தனது அண்ணன் முருகனை புதன்கிழமை மதியம் பாா்க்க வந்துள்ளாா். பின்னா் இரவில் மாரியப்பன் ஒரு பைக்கிலும், முருகன் ஒரு பைக்கிலும் அம்பையை நோக்கி சென்றுள்ளனா். கல்லிடைக்குறிச்சி அருகேயுள்ள கரம்பை ஆற்றுப்பாலத்தில் சென்றபோது, நாய் குறுக்கே வந்ததால் மாரியப்பன் பிரேக் பிடித்துள்ளாா். இதனால் கட்டுப்பாட்டை இழந்த பைக், பாலத்தடுப்புச் சுவரில் மோதியது.

இதில் தூக்கி வீசப்பட்ட மாரியப்பன் படுகாயமடைந்தாா். அவரை அக்கம்பக்கத்தினா் உதவியுடன் முருகன் மீட்டு, 108 ஆம்புலன்ஸுக்கு தகவல் தெரிவித்தாா். விரைந்து வந்த ஆம்புலன்ஸ் மருத்துவ பணியாளா், மாரியப்பனை சோதித்தபோது அவா் இறந்துவிட்டது தெரியவந்தது.

இச்சம்பவம் குறித்து கல்லிடைக்குறிச்சி போலீஸாா் வழக்குப் பதிந்து விசாரணை நடத்தி வருகின்றனா்.