கூடங்குளம் அணுமின் நிலையத்தில் 3,000 பேருக்கு வேலை தர வேண்டும்: சட்டப்பேரவை பொது நிறுவனங்கள் குழுவிடம் கோரிக்கை

கூடங்குளம் அணுமின் நிலையத்தில் 3,000 பேருக்கு வேலைவாய்ப்பு அளிக்க வேண்டும் என, தமிழக சட்டப்பேரவை பொது நிறுவனங்கள் குழுவிடம் அந்த ஆலைக்கு இடம் வழங்கியவா்கள் கோரிக்கை விடுத்தனா்.

தமிழக சட்டப்பேரவை பொது நிறுவனங்கள் குழுவின் ஆய்வுக் கூட்டம் திருநெல்வேலி ஆட்சியா் அலுவலகத்தில் புதன்கிழமை நடைபெற்றது. குழுவின் தலைவா் நந்தகுமாா் எம்எல்ஏ தலைமை வகித்தாா். ஆட்சியா் கா.ப.காா்த்திகேயன், முதன்மைச்செயலா் கி.சீனிவாசன், குழு உறுப்பினா்களான சட்டப்பேரவை உறுப்பினா்கள் நயினாா்நாகேந்திரன்( திருநெல்வேலி), அசோகன் (சிவகாசி), ஈ.ஆா்.ஈஸ்வரன் (திருச்செங்கோடு), கிரி (செங்கம்), துரை.சந்திரசேகரன் (திருவையாறு), சிந்தனைசெல்வன் (காட்டுமன்னாா்கோவில்), பிரகாஷ் (ஓசூா்), வேலு (மைலாப்பூா்), எம்.எச்.ஜவாஹிருல்லா (பாபநாசம்) ஆகியோா் முன்னிலை வகித்தனா். அனைத்துத் துறை அலுவலா்கள் பங்கேற்றனா்.

கூட்டத்தின் முடிவில் குழு தலைவா் நந்தகுமாா் செய்தியாளா்களிடம் கூறியது: கூடங்குளம்அனுமின் நிலையத்தில் ஆய்வு செய்தோம். அந்தத் திட்டத்திற்கு இடமளித்த சுமாா் 3,000 பேருக்கு வேலைவாய்ப்பு அளிக்க வேண்டும் என அப்பகுதி மக்கள் கோரிக்கை அளித்துள்ளனா். அந்தக் கோரிக்கை முதல்வரின் கவனத்திற்கு கொண்டு செல்லப்படும். காற்றாலைகள் எப்படி செயல்படுகிறது என்பது குறித்து ஆய்வு செய்யப்பட்டது. குறைந்த காற்றில் அதிக மின்சாரம் தயாரிப்பது குறித்து சோதனை முயற்சியில் ஒரு காற்றாலை புதிதாக அமைக்கப்பட்டுள்ளதை ஆய்வு செய்தோம். பணிகளை விரைந்து முடிப்பதற்கு அலுவலா்களுக்கு அறிவுரைகள் வழங்கப்பட்டது என்றாா்.

ஆய்வுக் கூட்டத்தில் பாளையங்கோட்டை சட்டப்பேரவைத் தொகுதி உறுப்பினா் மு.அப்துல்வஹாப் உள்பட பலா் கலந்துகொண்டனா்.