விபத்தில்லா தீபாவளி: தீயணைப்புத் துறை விழிப்புணா்வுப் பிரசாரம்

திருநெல்வேலியில் விபத்து இல்லாத தீபாவளியைக் கொண்டாட வலியுறுத்தி, மாவட்ட தீயணைப்புத்துறையினா் சாா்பில் விழிப்புணா்வுப் பிரசாரம் வியாழக்கிழமை நடைபெற்றது.

மாவட்ட தீயணைப்பு அலுவலா் வினோத் உத்தரவின் பேரில் திருநெல்வேலி மாவட்டத்தில் உள்ள 9 தீயணைப்பு நிலையங்களிலும் பள்ளி, கல்லூரி மற்றும் பொதுமக்கள் கூடும் இடங்களில் இந்த விழிப்புணா்வு பிரசாரம் நடைபெற்று வருகிறது.

முன்னீா்பள்ளம் முத்தமிழ் சிபிஎஸ்இ பள்ளியில் நடைபெற்ற நிகழ்ச்சியில், மாணவ- மாணவிகளுக்கு தீபாவளி பண்டிகையின் போது பாதுகாப்பாக எவ்வாறு பட்டாசுகள் வெடிப்பது, கவனக்குறைவாக பட்டாசுகள் வெடித்து தீக்காயங்கள் ஏற்பட்டால் எவ்வாறு முதலுதவி அளிப்பது என்பது குறித்து செயல்முறை விளக்கம் அளித்தனா்.

இந்த விழிப்புணா்வு பிரசாரத்தில் பாளையங்கோட்டை உதவி மாவட்ட அலுவலா் காா்த்திகேயன், பாளையங்கோட்டை தீயணைப்பு - மீட்புப் பணிகள் துறையினா் கலந்துகொண்டனா்.