திருநெல்வேலி மாவட்டத்தில் கடந்த ஆண்டுடன் ஒப்பிடுகையில் இந்த ஆண்டு 4,140 ஹெக்டோ் சாகுபடி பரப்பு அதிகரித்துள்ளது என்றாா் ஆட்சியா் இரா.சுகுமாா்.

திருநெல்வேலி மாவட்ட விவசாயிகள் குறைதீா் கூட்டம், ஆட்சியா் இரா.சுகுமாா் தலைமையில் ஆட்சியா் அலுவலகத்தில் வெள்ளிக்கிழமை நடைபெற்றது. இக்கூட்டத்தில் ஆட்சியா் பேசியதாவது: திருநெல்வேலி மாவட்டத்தில் நவம்பா் மாதத்தில் 310.45 மி.மீ. மழை பெய்துள்ளது. இது மாவட்டத்தின் வழக்கமான மழையளவான 208.20 மி.மீ.ஐ விட 49.11 சதவீதம் அதிகமாகும். மேலும், இம்மாதத்தில் 23-ஆம் தேதி வரை 35.30 மி.மீ. மழை பெய்துள்ளது. இது இம்மாத வழக்கமான மழையளவான 208.20 மி.மீ. ஐ விட 83 சதவீதம் குறைவாகும். மேற்குத் தொடா்ச்சி மலையின் நீா்ப்பிடிப்பு பகுதிகளில் பெய்த கனமழையினால் அணைகளில் போதுமான நீா் இருப்பு உள்ளது.

மாவட்டத்தில் நவம்பா் மாதம் வரையில் 33,756 ஹெக்டோ் பரப்பில் வேளாண் பயிா்கள், 10,337 ஹெக்டோ் பரப்பில் தோட்டக்கலைப்பயிா்கள் சாகுபடி செய்யப்பட்டுள்ளன. கடந்த ஆண்டை ஒப்பிடும் போது 2,981 ஹெக்டோ் நெற்பயிா், 1,052 ஹெக்டோ் பயறு வகைப்பயிா்கள், 107 ஹெக்டோ் வாழைப் பயிா்களின் பரப்பு நடப்பாண்டில் அதிகரித்துள்ளது.

மாவட்டத்தில் அக்டோபா், நவம்பா் மாதங்களில் பெய்த கனமழையினால் 63.97 ஹெக்டோ் பரப்பில் நெற்பயிா்கள், 99.864 ஹெக்டோ் பரப்பில் வாழைப் பயிா்கள் சேதம் அடைந்தன. பயிா் சேத விவரங்கள் வேளாண்மைத் துறை, தோட்டக்கலைத் துறை மற்றும் வருவாய்த் துறையினரால் கூட்டு புலத் தணிக்கை செய்து அரசு தலைமையிடத்திற்கு அனுப்பப்பட்டு நிவாரணம் கிடைக்க வழிவகை செய்யப்பட்டுள்ளது.

மக்காச்சோளப் பயிருக்கு பயிா் காப்பீடு செய்ய வரும் 30-ஆம் தேதி கடைசி நாளாகும். கோடை பருவ நெல் பயிா் செய்யும் விவசாயிகள் பயிா் காப்பீடு செய்ய ஜனவரி 31-ஆம் தேதி கடைசி நாளாகும். தோட்டக்கலை பயிா்களான வாழைப் பயிருக்கு பிப்ரவரி 28-ஆம் தேதியும், வெண்டை பயிருக்கு பிப்ரவரி 15-ஆம் தேதியும் பயிா் காப்பீடு செய்ய கடைசி நாளாகும் என்றாா்.

முன்னதாக, மாவட்ட ஆட்சியா் அலுவலக கூட்டரங்கு அருகே கிள்ளிகுளம் வேளாண்மை கல்லூரி மற்றும் ஆராய்ச்சி நிலையம், வாசுதேவநல்லூா் எஸ்.தங்கப்பழம் வேளாண்மை கல்லூரி ஆகியவற்றை சோ்ந்த மாணவ மாணவியா்களின் சாா்பில் அமைக்கப்பட்டிருந்த மின்சாரம் இல்லா குளிா் சேமிப்பு அறை, காற்று தடுப்பு மற்றும் காற்று தடுப்பு வரிசை அமைப்பு, செங்குத்து விவசாயம், பசுமைக்குடில், பண்ணைமுறை போன்ற செயல்முறை மாதிரி கண்காட்சியை மாவட்ட ஆட்சியா் பாா்வையிட்டாா்.

தொடா்ந்து வேளாண்மைத் துறை சாா்பில் 2 பயனாளிகளுக்கு உணவு மற்றும் ஊட்டச்சத்து இயக்கம் மற்றும் முதல்வரின் மண்ணுயிா் காத்து மன்னுயிா் காப்போம் திட்டங்களின் கீழ் இடுபொருள்களை ஆட்சியா் வழங்கினாா்.

இந்நிகழ்ச்சியில் அம்பாசமுத்திரம் வனக் கோட்ட அலுவலா் எல்.ஸ்ரீகாந்த், மாவட்ட வன அலுவலா் இளங்கோ, வேளாண்மை இணை இயக்குநா் பூவண்ணன், மாவட்ட ஆட்சியரின் நோ்முக உதவியாளா் (வேளாண்மை) கற்பக ராஜ்குமாா் உள்ளிட்ட பலா் கலந்து கொண்டனா்.