தூத்துக்குடி மாவட்டத்தில் உள்ள ரேஷன் கடைகளில் செவ்வாய்க்கிழமை (ஜன.10) முதல் பொங்கல் பரிசு பைகளை பெறலாம் என அறிவிக்கப்பட்டுள்ளது.
இதுகுறித்து ஆட்சியர் ம. ரவிகுமார் வெளியிட்ட செய்திக்குறிப்பு: தூத்துக்குடி மாவட்டத்தில் உள்ள அனைத்து நியாய விலைக் கடைகளிலும் பொங்கல் பண்டிகையை முன்னிட்டு அரிசி பெறும் குடும்ப அட்டைகள், காவலர் குடும்ப அட்டைகள் மற்றும் அகதிகள் முகாமில் தங்கியுள்ள இலங்கைத் தமிழர்கள் என மொத்தம் 4 லட்சத்து 28 ஆயிரத்து 878 குடும்பங்களுக்கு பொங்கல் பரிசுத் தொகுப்பு செவ்வாய்க்கிழமை முதல் வழங்கப்படுகிறது. பொங்கல் பரிசுத் தொகுப்பில் பச்சரிசி ஒரு கிலோ, சீனி ஒரு கிலோ, முந்திரி பருப்பு 20 கிராம், கிஸ்மிஸ் பழம் 20 கிராம், ஏலக்காய் 5 கிராம் மற்றும் கரும்புத்துண்டு (2 அடி) ஒரு எண்ணம் ஆகியவை வழங்கப்பட உள்ளது. பொதுமக்கள்  பொங்கல் பரிசை சம்பந்தப்பட்ட நியாய விலைக் கடைகளில் பெற்று பயனடைய கேட்டுக் கொள்ளப்படுகிறார்கள் என தெரிவிக்கப்பட்டுள்ளது.