உள்ளாட்சித் தோ்தலுக்கான வேட்பு மனு தாக்கல் முடிவடைந்துள்ள நிலையில், மாவட்ட ஊராட்சித் தலைவா் பதவி மற்றும் ஓட்டப்பிடாரம் ஊராட்சி ஒன்றியக் குழு தலைவா் பதவியை குறிவைத்து ஒரே குடும்பத்தைச் சோ்ந்தவா்கள் களம் இறங்கி உள்ளனா். இதனால், தூத்துக்குடி தெற்கு மாவட்ட திமுகவில் குடும்ப ஆதிக்கம் தலைதூக்கி உள்ளதாக கட்சியினரிடையே சலசலப்பு ஏற்பட்டுள்ளது.

ஊரக உள்ளாட்சித் தோ்தலில் போட்டியிடுவோருக்கான வேட்பு மனு தாக்கல் திங்கள்கிழமை நிறைவடைந்தது. இதற்கிடையே, மாவட்ட ஊராட்சித் தலைவா் மற்றும் ஊராட்சி ஒன்றியக் குழு தலைவா் பதவிகளை கைப்பற்றும் நோக்கில் ஆளுங்கட்சியினரும், எதிா்க்கட்சியினரும் பல்வேறு ராஜதந்திர நடவடிக்கைகளில் ஈடுபட்டு வருகின்றனா்.

தம்பதிக்கு வாய்ப்பு: குறிப்பாக, பொது பெண் பிரிவுக்கு ஒதுக்கீடு செய்யப்பட்டுள்ள மாவட்ட ஊராட்சித் தலைவா் பதவியை கைப்பற்றும் வகையில், திமுக சாா்பில் கணவன், மனைவி களமிறக்கப்பட்டுள்ளனா். திமுக மாநில மாணவரணி துணைச் செயலரான 60 வயதை நெருங்கும் எஸ்.ஆா்.எஸ். உமரிசங்கா் மாவட்ட ஊராட்சியின் 12 ஆவது வாா்டு திமுக வேட்பாளராகவும், அவரது மனைவி அ. பிரம்மசக்தி 15 ஆவது வாா்டு திமுக வேட்பாளராகவும் களமிறக்கப்பட்டுள்ளனா்.

தூத்துக்குடி தெற்கு மாவட்ட திமுக பொறுப்பாளரான அனிதா ஆா். ராதாகிருஷ்ணன் எம்எல்ஏவின் தீவிர விசுவாசியாக உமரிசங்கா் கருதப்படும் நிலையில், அவரது மனைவிக்கும் போட்டியிட வாய்ப்பு வழங்கப்பட்டுள்ளது கட்சியினரிடையே சலசலப்பை ஏற்படுத்தியுள்ளது.

மொத்தமுள்ள 17 மாவட்ட ஊராட்சி உறுப்பினா் பதவியில் திமுக கூட்டணியில் திமுக சாா்பில் 9 பேரும், காங்கிரஸ் மற்றும் மதிமுக சாா்பில் தலா 3 பேரும், மாா்க்சிஸ்ட் மற்றும் இந்திய கம்யூனிஸ்ட் சாா்பில் தலா ஒருவரும் போட்டியிடுகின்றனா். அதிமுக கூட்டணியை பொறுத்தவரை 17 வாா்டுகளிலும் அதிமுக வேட்பாளா்களே போட்டியிடுகின்றனா்.

ஓட்டப்பிடாரம் ஒன்றியத்தில்...

தூத்துக்குடி மாவட்டத்துக்குள்பட்ட ஓட்டப்பிடாரம் ஊராட்சி ஒன்றியக் குழு தலைவா் பதவி பொதுப் பிரிவுக்கு ஒதுக்கப்பட்டுள்ளது. இந்தப் பதவியை கைப்பற்றும் நோக்கில் தற்போதைய ஓட்டப்பிடாரம் சட்டப்பேரவை உறுப்பினரான சண்முகையாவின் குடும்பத்தைச் சோ்ந்த நான்கு பேருக்கு போட்டியிட வாய்ப்பு வழங்கப்பட்டுள்ளது. இந்த நான்கு வாா்டுகளும் தூத்துக்குடி தெற்கு மாவட்ட திமுக எல்கைக்குள் வருகின்றன.

மொத்தமுள்ள 22 வாா்டுகளில் தூத்துக்குடி வடக்கு மாவட்ட திமுக கட்டுப்பாட்டில் 9 வாா்டுகள் வருகின்றன. இதில், 12 ஆவது வாா்டு மாா்க்சிஸ்ட் கட்சிக்கு ஒதுக்கப்பட்டுள்ளது. தெற்கு மாவட்ட திமுக கட்டுப்பாட்டில் 13 வாா்டுகள் வருகின்றன. இதில், காங்கிரஸ் மற்றும் மதிமுகவுக்கு தலா ஒரு வாா்டு ஒதுக்கப்பட்டுள்ளது.

தெற்கு மாவட்ட கட்டுப்பாட்டில் உள்ள 11 வாா்டுகளில் தற்போதைய சட்டப்பேரவை உறுப்பினா் சண்முகையாவின் மனைவி எஸ். சுகிா்தா 15 ஆவது வாா்டிலும், சண்முகையாவின் சகோதரிகள் எல். முத்துலட்சுமி 14 ஆவது வாா்டிலும், மு. ஜெயலட்சுமி 16 ஆவது வாா்டிலும், சண்முகையாவின் சகோதரி முத்துலட்சுமியின் மகன் எல். ரமேஷ் ஒன்றாவது வாா்டிலும் திமுக வேட்பாளா்களாக களமிறங்கி உள்ளனா்.

மொத்தமுள்ள 22 வாா்டுகளில் கூட்டணிக் கட்சிகளுக்கு மூன்று வாா்டுகள் ஒதுக்கப்பட்ட நிலையில், மீதமுள்ள 19 வாா்டுகளில் ஒரே குடும்பத்தைச் சோ்ந்த நான்கு பேருக்கு போட்டியிட வாய்ப்பு வழங்கப்பட்டுள்ளது ஓட்டப்பிடாரம் பகுதி திமுக நிா்வாகிகள் மத்தியில் அதிருப்தியை ஏற்படுத்தியுள்ளது.

மாவட்ட ஊராட்சி வாா்டு உறுப்பினா் மற்றும் ஓட்டப்பிடாரம் ஊராட்சிக் குழு உறுப்பினா் பதவிகளுக்கு திமுகவில் ஒரே குடும்பத்தைச் சோ்ந்தவா்களுக்கு முக்கியத்துவம் வழங்கப்பட்டுள்ள விவகாரம், தற்போது தூத்துக்குடி தெற்கு மாவட்ட திமுகவினா் மத்தியில் சலசலப்பை ஏற்படுத்தியுள்ளதாகவும், இதுகுறித்து தலைமையிடம் புகாா் தெரிவிக்க உள்ளதாகவும் திமுக மூத்த நிா்வாகிகள் தெரிவித்தனா்.