தமிழக அரசியலில் பாஜக தவிா்க்க முடியாத சக்தி

தமிழக அரசியலில் தவிா்க்க முடியாத சக்தியாக பாஜக உள்ளது என்றாா் மாநிலத் தலைவா் எல்.முருகன்.

திருச்செந்தூரில் திங்கள்கிழமை நடைபெற்ற வேல் யாத்திரை நிறைவு விழாவில் எல்.முருகன் பேசியது: தமிழா் பண்பாடு, கலாசாரம் மற்றும் ஹிந்துக்களுக்கு எதிரானவா்களுக்கு பாடம் புகட்டவே வேல் யாத்திரை நடத்தப்பட்டது.

கரோனா காலத்தில் மக்களுக்கு பாஜகவினா் ஏராளமான உதவிகளைச் செய்து வருகின்றனா். தமிழக அரசியலில் பாஜக தவிா்க்க முடியாத சக்தியாக உள்ளது. மத்தியில் ஊழலற்ற ஆட்சி அமைத்தவா் மோடி. தமிழகத்திலும் பாஜக ஆட்சி மலரும். தற்போது அனைத்துக் கட்சி முக்கியப் பிரமுகா்களும், திரைப்பட நடிகா்களும் பாஜகவில் இணைந்து வருகிறாா்கள். வரும் சட்டப்பேரவைத் தோ்தல் மூலம் பேரவைக்கு அதிகப்படியான பாஜக உறுப்பினா்களை அனுப்புவதே நம் வேலை. யாத்திரை முடியவில்லை ஆரம்பமாகியுள்ளது என்றாா் அவா்.

மகளிரணி தேசிய தலைவா் வானதி சீனிவாசன்: தமிழகத்தில் கூட்டணி பெரியதாக இல்லாதபோதே பாஜக வெற்றி பெற்று சட்டப்பேரவைக்குச் சென்றுள்ளது. தற்போது அனைத்து மாவட்டங்களிலும் ஆயிரக்கணக்கான தொண்டா்கள் பாஜகவில் உள்ளனா். எங்களுக்கு கூட்டணி தா்மம் உண்டு; அதே வேளையில் லட்சியமும் உள்ளது. தமிழகத்தில் பாஜக சொந்தக் காலில் நிற்கும் காலம் வரும் என்றாா்.

ஹெச்.ராஜா: ரஜினிகாந்த் கூறும் ஆன்மிக அரசியலை பாஜக ஏற்கெனவே செய்து கொண்டிருக்கிறது. கடந்த 2004-ஆம் ஆண்டுமுதல் 2014-ஆம் ஆண்டு வரை விவசாயிகள் பெயரில் கடன் தள்ளுபடி ரூ. 60 ஆயிரம் கோடி. ஆனால், கடந்த 3 ஆண்டுகளில் விவசாயிகள் வங்கிக் கணக்கில் மத்திய அரசு செலுத்திய தொகை ரூ. 95 ஆயிரம் கோடி ஆகும் என்றாா்.