தூத்துக்குடி புதூா் பாண்டியாபுரம் பகுதியில் அமைந்துள்ள தனியாா் மீன் பதப்படுத்தும் ஆலையில் வெள்ளிக்கிழமை நள்ளிரவில் ஏற்பட்ட தீ விபத்து காரணமாக, பெண் தொழிலாளா்கள் 30 போ் மயக்கம் அடைந்தனா். ஆலையில் அமோனியா வாயு கசிவு ஏற்பட்டதாகத் தகவல் பரவியதால் பரபரப்பு ஏற்பட்டது.

இந்த ஆலையில் மீன்கள் பதப்படுத்தப்பட்டு, ஏற்றுமதி செய்யப்படுகிறது. இங்கு தமிழகம் மற்றும் வெளி மாநிலங்களைச் சோ்ந்த சுமாா் 500-க்கும் மேற்பட்ட பெண்கள் பணியாற்றி வருகின்றனா்.

இந்நிலையில் வெள்ளிக்கிழமை நள்ளிரவு ஆலையில் மின்கசிவு காரணமாக தீ விபத்து ஏற்பட்டது. அப்போது, ஆலையில் இருந்த அமோனியா குழாயில் கசிவு ஏற்பட்டதாகக் கூறப்படுகிறது. அங்கு பணியில் இருந்த தமிழகத்தைச் சோ்ந்த 12 பெண்கள் மற்றும் ஒடிசாவைச் சோ்ந்த 16 பெண்கள், அஸ்ஸாம் மாநிலத்தைச் சோ்ந்த 2 பெண்கள் என 30 பேருக்கு மூச்சுத்திணறல் மற்றும் கண் எரிச்சல் ஏற்பட்டு மயக்கம் அடைந்ததாகக் கூறப்படுகிறது. உடனடியாக அவா்கள் அனைவரும் மீட்கப்பட்டு தூத்துக்குடியில் உள்ள 3 தனியாா் மருத்துவமனைகளில் அனுமதிக்கப்பட்டனா்.

இதுகுறித்த தகவலின்பேரில், நிகழ்விடத்துக்கு வந்த தீயணைப்புத் துறையினா் சுமாா் 4 மணி நேரம் போராடி தீயை அணைந்தனா். இதில், தீயணைப்பு வீரா் ஒருவருக்கும் மயக்கம் ஏற்பட்டது. அவரும் அருகில் உள்ள தனியாா் மருத்துவமனையில் அனுமதிக்கப்பட்டாா்.

தமிழ்நாடு மாசு கட்டுப்பாட்டு வாரிய பொறியாளா் முரளி தலைமையிலான குழுவினா், ஆலையில் ஆய்வு மேற்கொண்டனா். மேலும் இதுதொடா்பாக தாளமுத்துநகா் போலீஸாா் விசாரணை மேற்கொண்டு வருகின்றனா்.

அமோனியா வாயு கசிவு இல்லை: அமோனியா வாயு கசிவு ஏற்படவில்லை என்று ஆலையின் பொதுமேலாளா் வேல்முருகன் கூறினாா்.

இதுகுறித்து அவா் கூறியதாவது:

மீன்பதப்படுத்தும் ஆலையின் முதலாவது தளத்தில் உள்ள ஒரு பிரிவில் மின் கசிவு காரணமாக வெள்ளிக்கிழமை நள்ளிரவு தீ விபத்து ஏற்பட்டது. இதில் ஏற்பட்ட புகைமூட்டம் காரணமாக, அங்கு பணியாற்றிய 30 பெண் தொழிலாளா்களுக்கு மூச்சுத்திணறல் ஏற்பட்டது. அனைவரும் தனியாா் மருத்துவமனையில் அனுமதிக்கப்பட்டு நலமுடன் உள்ளனா். ஆலையில் அமோனியா வாயு

கசிவு ஏற்படவில்லை என்றாா்.

அமைச்சா்கள் ஆய்வு: தீ விபத்து ஏற்பட்ட ஆலையில், தொழிலாளா் நலத்துறை அமைச்சா் சி.வி.கணேசன் மற்றும் சமூக நலன்-மகளிா் உரிமைத் துறை அமைச்சா் பெ.கீதாஜீவன், மீன்வளம்-மீனவா் நலன், கால்நடைப் பராமரிப்புத் துறை அமைச்சா் அனிதா ஆா்.ராதாகிருஷ்ணன் ஆகியோா் சனிக்கிழமை ஆய்வு செய்தனா்.

முன்னதாக, மருத்துவமனையில் அனுமதிக்கப்பட்டுள்ள அந்த ஆலையின் தொழிலாளா்களைச் சந்தித்து அமைச்சா்கள் ஆறுதல் கூறினா். பின்னா் அமைச்சா் சி.வி.கணேசன் செய்தியாளா்களிடம் கூறியதாவது:

மின்கசிவு காரணமாக தீ விபத்து ஏற்பட்டுள்ளது. அதில் ஏற்பட்ட புகை மூட்டத்தில் சிக்கியதில் தொழிலாளா்கள் மயக்கம் அடைந்துள்ளனா். இவா்களில் 8 போ் சிகிச்சை முடிந்து வீட்டிற்கு அனுப்பி வைக்கப்பட்டனா். மற்றவா்கள் ஞாயிற்றுக்கிழமை அனுப்பி வைக்கப்படுவா்.

இந்த ஆலையில் அமோனியா வாயு கசிவு ஏற்படவில்லை என முதல்கட்ட ஆய்வில் தெரியவந்துள்ளது. இருப்பினும், இதுகுறித்து முழுமையாக ஆய்வு செய்து அறிக்கை சமா்ப்பிக்க தொழிலக பாதுகாப்பு மற்றும் சுகாதார இயக்ககத்திற்கு உத்தரவிடப்பட்டுள்ளது. ஆலையை இயக்க எந்த தடையும் இல்லை என்றாா்.

மாவட்ட ஆட்சியா் கோ.லட்சுமிபதி, காவல் கண்காணிப்பாளா் எல்.பாலாஜி சரவணன், ஓட்டப்பிடாரம் சட்டப்பேரவை உறுப்பினா் எம்.சி.சண்முகையா உள்ளிட்டோா் உடன் இருந்தனா்.