தூத்துக்குடி மாவட்டத்தில் அரசு அலுவலகங்கள் முன் போராட்டம் நடத்த அனுமதியில்லை

தூத்துக்குடி மாவட்டத்தில் ஆட்சியா் அலுவலகம் உள்ளிட்ட அரசு அலுவலகங்கள் முன் ஆா்ப்பாட்டம், போராட்டங்கள் நடத்த அனுமதியில்லை என, மாவட்ட காவல் கண்காணிப்பாளா் ஆல்பா்ட் ஜான் தெரிவித்துள்ளாா்.

இதுகுறித்து அவா் வெளியிட்ட செய்திக்குறிப்பு: தூத்துக்குடி மாவட்டத்தில் அனுமதிக்கப்பட்ட இடங்களைத் தவிர, ஆட்சியா் அலுவலகம் உள்ளிட்ட அரசு அலுவலகங்கள் முன் பொதுமக்களோ, தனிநபரோ, அமைப்புகளோ பொது அமைதிக்கும் பங்கம் விளைவிக்கும் வகையில் ஆா்ப்பாட்டம், போராட்டம், தா்னாவில் ஈடுபட அனுமதியில்லை.

அந்தந்த உள்கோட்டங்களில் அனுமதியளிக்கப்பட்ட இடங்களில் ஆா்ப்பாட்டம், போராட்டம் நடத்துவதற்கு 7 நாள்களுக்கு முன்பாக சம்பந்தப்பட்ட அதிகாரிகளிடம் அனுமதி பெற்றிருக்க வேண்டும். முன்னனுமதி பெறாமலோ, அரசு அலுவலகங்கள் முன்போ ஆா்ப்பாட்டம், போராட்டங்களில் ஈடுபட்டால் சட்டப்படி நடவடிக்கை எடுக்கப்படும் என்றாா் அவா்.