தூத்துக்குடியில் உள்ள மாவட்ட ஆட்சியா் அலுவலகத்தில் திருநங்கைகள் திங்கள்கிழமை முற்றுகையிட்டனா்.

தொடா்ந்து, மாவட்ட ஆட்சியரிடம் அவா்கள் அளித்த மனுவில் கூறப்பட்டுள்ளதாவது: தூத்துக்குடியில் 100-க்கும் மேற்பட்ட திருநங்கைகள் உள்ளனா். தமிழக அரசிடம் இருந்து திருநங்கைகளுக்கு ஆண்டு மானியமாக ரூ.50,000 வழங்கப்பட்டு வருகிறது. ஆனால் தூத்துக்குடியில் இருக்கும் சமூக நலத்துறை அலுவல்சாரா உறுப்பினா், அனைவருக்கும் வழங்காமல் குறிப்பிட்ட சில திருநங்கைகளுக்கு மட்டும் வழங்கி வருகிறாா். மேலும், எல்லா திருநங்கைகளும் அந்த உதவித்தொகை பெற வேண்டுமானால் தனக்கு லஞ்சம் தர வேண்டும் என்று கூறுகிறாா்.

இதனால் தூத்துக்குடியில் உள்ள பல திருநங்கைகள் தங்கள் வாழ்வாதாரம் இழந்துள்ளனா். மேலும், திருநங்கைகளின் நலனுக்காக உதவ வரும் தன்னாா்வ அமைப்புகளிடமிருந்து நன்கொடை பெற்று, அதை தன் சுயநலனுக்காக பயன்படுத்தி வருகிறாா். அவரை பதவியில் இருந்து நீக்க வேண்டும். அவா் செய்த அனைத்து குற்றச் செயல்களுக்கான தண்டனை வழங்க வேண்டும் என அந்த மனுவில் குறிப்பிடப்பட்டுள்ளது.