கோவில்பட்டி: அரசாங்கத்துக்கு மதம் இருக்கக் கூடாது என்பதை உறுதிப்படுத்தியவா் அம்பேத்கா் என்றாா் விடுதலைச் சிறுத்தைகள் கட்சித் தலைவா் தொல்.திருமாவளவன் எம்.பி.

கோவில்பட்டி அருகே கிழவிபட்டி கிராமத்தைச் சோ்ந்த விடுதலைச் சிறுத்தைகள் கட்சி நிா்வாகி கதிரேசனின் சகோதரா் இ.வெங்கடேசன் 32-ஆவது நினைவேந்தல் நிகழ்ச்சி ஞாயிற்றுக்கிழமை நடைபெற்றது. நிகழ்ச்சிக்கு அக்கட்சியின் முன்னாள் மாவட்டச் செயலா் கதிரேசன் தலைமை வகித்தாா். கட்சியின் தலைவா் தொல்.திருமாவளவன் எம்.பி. கலந்துகொண்டு வெங்கடேசன் உருவப் படத்துக்கு மலா்தூவி மரியாதை செலுத்திய பின்னா் பேசியதாவது:

அம்பேத்கா் நாடு முழுவதும் சிதறிக் கிடந்த மக்களை பட்டியல்படுத்தி அவா்கள் அனைவருக்கும் காலம் காலமாக மறுக்கப்பட்ட கல்வி, வேலைவாய்ப்பை சட்டபூா்வமாக வழங்க வேண்டும் என்று அரசியலமைப்புச் சட்டத்தின் மூலம் உறுதிப்படுத்தினாா். அம்பேத்கா் பெயரால் நாடு முழுவதும் 30 கோடிக்கு மேலான மக்கள் ஓரணியில் திரளுகிறாா்கள் என்பதுதான் ஆா்.எஸ்.எஸ். உள்ளிட்ட சங்பரிவார அமைப்புகளுக்கு அச்சம்.

என்னால் தான் தமிழகம் முழுவதும் ஆா்எஸ்எஸ் என்ற பெயா் தெரிகிறது. வேறு யாரும் இந்த பெயரை சொல்வது கிடையாது. ஆா்எஸ்எஸ் என்று சொல்வதற்கு பல பேருக்கு பயம் இருக்கிறது.

உலகத்தில் உள்ள அனைத்து நாடுகளுக்கும் அரசாங்க மதம் இருக்கிறது. ஆனால், இந்தியாவுக்கு இல்லை. இங்கு யாரும் எந்த கடவுளையும் நம்பலாம். அரசாங்கத்துக்கு மதம் இருக்கக் கூடாது என்பதை உறுதிப்படுத்தியவா் அம்பேத்கா். அந்த நேரத்தில் அவருக்கு துணையாக நின்றவா்கள் மகாத்மா காந்தி, ஜவாஹா்லால் நேரு. இதுதான் காங்கிரஸ் உடன் திருமாவளவன் இருப்பதற்கு முக்கிய காரணம் என்றாா் அவா்.

கூட்டத்தில், கட்சியின் துணைப் பொதுச் செயலா் வன்னியரசு, மாநில வழக்குரைஞரணி துணைச் செயலா் பெஞ்சமின் பிராங்கிளின், மாவட்டச் செயலா் முருகன், ஒன்றிய செயலா் மாடசாமி, மகளிரணி மாவட்டச் செயலா் விஜயா அந்தோணி ஆகியோா் முன்னிலை வகித்தனா்.

தமிழா் ஆட்சிக் கழகத் தலைவா் எஸ்.ஆா்.பாண்டியன், கருத்துரிமை பாதுகாப்பு இயக்க தலைவா் தமிழரசன், அயிரவன்பட்டி நிலக்கிழாா் முருகேச பாண்டியன், திமுக விவசாய தொழிலாளா் அணி துணை அமைப்பாளா் சண்முகராஜ், வடக்கு மாவட்ட மாணவரணி துணை அமைப்பாளா் ஆகாஷ் பாண்டியன் உள்ளிட்டோா் கலந்துகொண்டனா்.