அரியலூர் மாவட்டம் பூண்டி அருகேயுள்ள வேப்பங்குழி கிராமத்தில் மூடப்பட்ட மதுக்கடையை திறப்பதற்கான முயற்சியைக் கண்டித்து  அப்பகுதி இளைஞர்கள் செவ்வாய்க்கிழமை போராட்டத்தில் ஈடுபட்டனர்.
வேப்பங்குழி கிராமத்தில் பல ஆண்டுகளாக இயங்கி வந்த மதுக்கடை, நீதிமன்ற உத்தரவின் பேரில் மூடப்பட்டது. இந்நிலையில், தற்போது எங்கள் ஊரின் மயானம் அருகே மதுக்கடை திறப்பதற்கான முயற்சிகள் நடைபெற்று வருவதாகக் கூறப்படுகிறது.
இதையடுத்து மதுக்கடை வேண்டாம் என்று அப்பகுதி இளைஞர்கள் ஆட்சியரிடம் கடந்த வாரம் மனு அளித்திருந்தனர்.   இந்நிலையில், மதுக்கடை அமையவுள்ள இடத்தில் அப்பகுதி இளைஞர்கள் செவ்வாய்க்கிழமை சாலையைத் துண்டித்து, பூண்டி ஊராட்சிக்குட்பட்ட எல்லைக்குள் மதுக்கடை அல்லது தனியார் மதுபான பார்களோ அமைப்பதற்கு அனுமதி கிடையாது என விளம்பரத் தட்டி அமைத்து போராட்டத்தில் ஈடுபட்டனர்.