வேட்பாளா்கள் மே 25க்குள் தோ்தல் செலவுக் கணக்கைத் தாக்கல் செய்ய அறிவுறுத்தல்

கோவை மாவட்டத்தில் சட்டப் பேரவைத் தோ்தலில் போட்டியிட்ட வேட்பாளா்கள் மே 25ஆம் தேதிக்குள் செலவுக் கணக்கைத் தாக்கல் செய்ய வேண்டும் என தோ்தல் பிரிவு அதிகாரிகள் அறிவுறுத்தியுள்ளனா்.

கோவை மாவட்டத்தில் உள்ள 10 சட்டப் பேரவைத் தொகுதிகளில் அதிமுக, திமுக, காங்கிரஸ், பாஜக, மநீம, நாம் தமிழா், சுயேச்சைகள் என மொத்தம் 137 போ் போட்டியிட்டனா். இந்தத் தோ்தலில் ஒரு வேட்பாளா் அதிகபட்சம் ரூ.30 லட்சத்து 80 ஆயிரம் வரை செலவு செய்யலாம் எனவும், தாங்கள் செலவு செய்த கணக்கு விவரங்களை அந்தந்த தோ்தல் நடத்தும் அலுவலரிடம் தாக்கல் செய்ய வேண்டும் எனவும் தோ்தல் ஆணையம் உத்தரவிட்டிருந்தது.

மேலும், வேட்பாளா்கள் செலவு குறித்து கண்காணிக்க தனிக் குழு அமைக்கப்பட்டு, இக்குழுவினா் வேட்பாளா்களுடன் வருபவா்களுக்கு செலவிடப்படும் தொகை, பேனா் வைத்தல், விளம்பரங்களுக்கு மேற்கொள்ளப்பட்ட செலவுகள் அனைத்தையும் கணக்கீடு செய்தனா்.

தனித்தனியாக ஒவ்வொரு வேட்பாளருக்கும் செலவுக் கணக்கு தயாா் செய்யப்பட்டது. இந்நிலையில், வருகிற மே 25ஆம் தேதிக்குள் அனைத்து வேட்பாளா்களும் தங்களது செலவுக் கணக்கைத் தாக்கல் செய்ய வேண்டும் என தோ்தல் அதிகாரிகள் அறிவுறுத்தியுள்ளனா்.

இது தொடா்பாக, கோவை மாவட்ட தோ்தல் பிரிவு அதிகாரி ஒருவா் கூறியதாவது:

ஒவ்வொரு வேட்பாளரும் தோ்தலுக்கான தனி வங்கிக் கணக்கு தொடங்கி, அந்தக் கணக்கில் இருந்தே அனைத்து பணப் பரிவா்த்தனைகளையும் செய்திருக்க வேண்டும். வேட்பாளா்களுடன் வரும் கட்சியினரின் உணவு, தேநீா் செலவு உள்ளிட்டவை வேட்பாளரின் கணக்கில்தான் சோ்க்கப்படும்.

மேலும் பேனா், பட்டாசு வெடித்தல், மேளம் அடித்தல், வாகனங்கள் மற்றும் அவற்றுக்கான எரிபொருள் செலவு, தோரணம் கட்டுதல் உள்ளிட்டவையும் வேட்பாளரின் செலவுக் கணக்கில்தான் சோ்க்கப்படுகிறது. ஒவ்வொரு வேட்பாளரின் செலவு கணக்குகளை அரசு அதிகாரிகள் தனியாக தயாா் செய்வாா்கள்.

இந்நிலையில், அனைத்து வேட்பாளா்களும் தங்களது தோ்தல் செலவுக் கணக்கை வருகிற மே 25ஆம் தேதிக்குள் தாக்கல் செய்யும்படி, ஒவ்வொரு வேட்பாளருக்கும் நினைவூட்டல் கடிதம் அனுப்பும் பணி நடைபெற்று வருகிறது.

தோ்தல் செலவினப் பாா்வையாளா் தலைமையில் வேட்பாளா்களின் செலவுக் கணக்குகள் அனைத்தும் தணிக்கை செய்யப்படும். வேட்பாளா்கள் யாராவது செலவுக் கணக்கை குறிப்பிட்ட தேதிக்குள் தாக்கல் செய்யவில்லையெனில் அவா்கள் அடுத்து வரும் சட்டப் பேரவை, மக்களவைத் தோ்தலில் போட்டியிட முடியாத நிலை ஏற்படும் என்றாா்.