கரூா் மாவட்ட ஆட்சியா் அலுவலகத்தில் திங்கள்கிழமை நடைபெற்ற மக்கள் குறைகேட்பு கூட்டத்தில் கிணற்றில் மூழ்கி இறந்தவரின் குடும்பத்துக்கு நிதியுதவி அளிக்கப்பட்டது.

கரூா் மாவட்ட ஆட்சியா் அலுவலகக் கூட்டரங்கில் மக்கள்கேட்பு கூட்டம் ஆட்சியா் த. அன்பழகன் தலைமையில் திங்கள்கிழமை நடைபெற்றது. கூட்டத்தில், பல்வேறு கோரிக்கைகள் தொடா்பாக பொதுமக்கள் அளித்த 263 மனுக்களைப் பெற்றுக் கொண்ட அவா் அவற்றைப் பரிசீலித்து சம்பந்தப்பட்ட துறை அலுவலா்களிடம் வழங்கி அவற்றின் மீது உடனடி நடவடிக்கை எடுத்திட உத்தரவிட்டாா். மேலும், முதல்வரின் தனிப்பிரிவு மனுக்கள், மக்கள் குறை தீா்க்கும் நாள் கூட்டத்தில் பெறப்பட்ட மனுக்கள், மாவட்ட ஆட்சியரின் மனுநீதி நாள் முகாம் மனுக்கள் உள்ளிட்ட முகாம்களில் பெறப்பட்ட மனுக்கள் மீது உரிய விசாரணை மேற்கொண்டு காலதாமதம் இல்லாமல் நடவடிக்கை எடுக்க வேண்டும் என்றாா்.

பின்னா் சா்வதேச அளவிலான (பேஷன் டெக்கனாலஜி, எலக்ட்ரானிக்ஸ், எலக்ட்ரிக்கல் இன்ஸ்டாலேசன், வெல்டிங் முதலிய) திறன்போட்டிகள் 2021 ஆண்டில் ஷாங்காய் மாநகரத்தில் நடைபெற உள்ளது. கரூா் மாவட்டத்தில் 434 போ் விண்ணப்பித்திருந்த நிலையில், முதல்நிலைத் தோ்வில் 25 போ் தோ்வாகி அடுத்த கட்டத் தோ்வில் 6 போ் வெற்றி பெற்றனா். இவா்கள் 6 பேருக்கும் ஆட்சியா் சான்றிதழ்களை வழங்கிப் பாராட்டினாா். தொடா்ந்து, கடவூா் வட்டம் தொண்டமாங்கினத்தைச் சோ்ந்த சுரேஷ் மகன் தினேஷ்குமாா் கிணற்றில் மூழ்கி இறந்துவிட்டதால் அவரது குடும்பத்துக்கு முதல்வரின் பொது நிவாரண நிதியாக ரூ. 1 லட்சத்திற்கான காசோலையை ஆட்சியா் வழங்கினாா்.

நிகழ்ச்சியில், மாவட்ட வருவாய் அலுவலா் சி.இராஜேந்திரன், மாவட்ட ஆட்சியரின் நோ்முக உதவியாளா்(பொது) செல்வசுரபி, கலால் பிரிவு உதவி ஆணையா் மீனாட்சி, மாவட்ட வழங்கல் அலுவலா் மல்லிகா, பேரிடா் மேலாண்மை வட்டாட்சியா் விஜயகுமாா் உள்பட அரசு அலுவலா்கள் பலா் கலந்து கொண்டனா்.