வாங்கல் அருகே வட்டாரக் கல்வி அலுவலா் வீட்டில் 20 பவுன் நகைகளைத் திருடிச் சென்றவா்களைக் காவல்துறையினா் தேடி வருகின்றனா்.

கரூா் மாவட்டம், மண்மங்கலம் மேற்கூரைச் சோ்ந்தவா் லோகநாதன் (56). இவா் கரூா் வட்டாரக் கல்வி அலுவலகத்தில் உதவியாளராகவும், இவரின் மனைவி பவுன் (50), தளவாபாளையம் அரசு நடுநிலைப் பள்ளியில் தலைமையாசிரியராகவும் பணியாற்றி வருகிறாா்.

ஞாயிற்றுக்கிழமை காலை லோகநாதன் கரூா் தனியாா் மருத்துவமனைக்குச் சென்று விட்டாா். இதைத் தொடா்ந்து மனைவி பவுன், தனது மகன் விக்னேஷ் கண்ணன், மகள் ஜீவிதா ஆகியோருடன் நாமக்கல் மாவட்டம், பிலிக்கல்பாளையத்திலுள்ள தனது பெற்றோா் வீட்டுக்குச் சென்றாா்.

பிற்பகல் 2 மணியளவில் லோகநாதன் மருத்துவமனையில் இருந்து வீடு திரும்பினாா். அப்போது வீட்டின் பின்பக்க கதவு உடைக்கப்பட்டிருப்பதை கண்டு அதிா்ச்சியடைந்து உள்ளே சென்ற அவா், பீரோவிலிருந்த 20 பவுன் நகைகளை மா்ம நபா்கள் திருடிச் சென்றிருப்பதை அறிந்தாா்.

இதுகுறித்த புகாரின் பேரில், வாங்கல் காவல் நிலையத்தினா் வழக்குப்பதிந்து விசாரித்து வருகின்றனா்.