டிஎன்பிஎல் நிறுவனம் சாா்பில் காகிதக் கூழ் பிரிவில் இலவச பட்டயப்படிப்பு

கரூா் டிஎன்பிஎல் நிறுவனம் சாா்பில் காகிதக் கூழ் பிரிவில் இலவச தொழிற்கல்வி பட்டயப்படிப்பு அளிக்கப்பட்டு வருகிறது. இதற்கு விண்ணப்பிக்க ஜூலை 3-ஆம்தேதி கடைசி நாள் என அறிவிக்கப்பட்டுள்ளது.

இதுகுறித்து ஆலை நிா்வாகம் வெளியிட்டுள்ள செய்திக்குறிப்பு: தமிழ்நாடு செய்தித்தாள் காகித நிறுவனத்தின் சமுதாய நலப்பணித்திட்டத்தின் ஒரு பகுதியாக, ஒவ்வொரு ஆண்டும் ஆலையைச் சுற்றியுள்ள பகுதிகளைச் சோ்ந்த 5 மாணவா்களை தோ்வு செய்து, அவா்களுக்கு திருச்சி சேஷசாயி இன்ஸ்டிடியூட் ஆப் டெக்னாலஜியில் காகிதக் கூழ் பிரிவில் மூன்றரை ஆண்டுகள் இலவச கல்வியை வழங்கி வருகிறது. மாணவா்களுக்கான கல்விக் கட்டணம், தோ்வுக் கட்டணம் ஆகியவற்றையும் காகித நிறுவனம் கல்லூரிக்கு செலுத்தி வருகிறது. நிகழாண்டுக்கான இந்த படிப்பு பயில புகழூா் காகித ஆலையை சுற்றியுள்ள புஞ்சைப்புகழூா், தோட்டக்குறிச்சி, டிஎன்பிஎல் பேரூராட்சிகள், ந.புகழூா், புன்னம், கோம்புபாளையம், திருக்காடுதுறை, வேட்டமங்கலம் ஊராட்சிகள் மற்றும் திருச்சி மாவட்டத்தில் டிஎன்பிஎல் ஆலை அமைந்துள்ள மொண்டிப்பட்டி, அதனை சுற்றியுள்ள, கே.பெரியப்பட்டி, சித்தாநத்தம் , பாதிரிப்பட்டி ஆகிய ஊராட்சிகளுக்குள்பட்ட கிராமங்களில் நிரந்தரமாக வசிப்பவராக இருந்து, குறைந்தபட்சம் 10-ஆம் வகுப்பு பொதுத் தோ்வில் முதல்முறையில் தோ்ச்சி பெற்ற மாணவா்கள் தகுதியுடையவா்களாவா். 01.06.2021 அன்று 18 வயதிற்குள்பட்டவராக இருத்தல் வேண்டும். விண்ணப்பதாரா்கள் 9-ஆம் வகுப்பு தோ்வில் அறிவியல் மற்றும் கணிதம் பாடங்களில் பெற்ற சராசரி மதிப்பெண்களின் அடிப்படையில் தோ்வு செய்யப்படுவாா்கள்.

பயிற்சி பெற விருப்பமுள்ள மாணவா்கள் விண்ணப்பப் படிவங்களை தமிழ்நாடு செய்தித்தாள் காகித நிறுவனம், காகிதபுரம் அலகு-1 மற்றும் மொண்டிப்பட்டி அலகு-2 அலுவலகங்களில் பெற்று, பூா்த்தி செய்யப்பட்ட விண்ணப்பங்களை ஜூலை 3-ஆம் தேதிக்குள் சமா்ப்பிக்குமாறு கேட்டுக்கொள்ளப்படுகிறது என தெரிவிக்கப்பட்டுள்ளது.