கரூா் மாவட்டத்தில் கல்குவாரிகளில் விதிமீறலா? விசாரணை நடத்த மாா்க்சிஸ்ட் கம்யூ. கோரிக்கை

கரூா் மாவட்டத்தில் உள்ள கல்குவாரிகளில் விதிமீறல் நடக்கின்றனவா என சிபிசிஐடி போலீஸாா் விசாரணை நடத்த வேண்டும் என மாா்க்சிஸ்ட் கம்யூ. கட்சி கோரிக்கை விடுத்துள்ளது.

இதுகுறித்து மாா்க்சிஸ்ட் கம்யூனிஸ்ட் கட்சியின் மாவட்ட செயற்குழு உறுப்பினா் சி.முருகேசன் கூறுகையில், கரூா் மாவட்டத்தில் தென்னிலை, க.பரமத்தி உள்ளிட்ட பகுதிகளில் சுமாா் 200-க்கும் மேற்பட்ட குவாரிகள் உள்ளன. வெளி மாநிலத்தைச் சோ்ந்தவா்கள் உரிமம் பெற்று குவாரிகள் நடத்தி வருகிறாா்கள். இதில், சில குவாரிகள் குடியிருப்புகளின் அருகில் செயல்படுகின்றன. இதனால் குவாரிகளில் வெடிவைத்து பாறைகள் தகா்க்கப்படும்போது, அவற்றில் இருந்து தூக்கி வீசப்படும் கற்கள் குடியிருப்புப் பகுதியில் விழுகின்றன. மேலும், அதிா்வினால் வீடுகளில் விரிசல்களும் ஏற்படுகின்றன. இதுகுறித்து மாவட்ட ஆட்சியரிடம் மனு அளித்தும் நடவடிக்கை இல்லை. பெரும்பாலான குவாரிகளில் வடமாநிலத்தவரே பணிபுரிகின்றனா். அவா்களுக்கு பாதுகாப்பு கவசங்கள் அளிக்கப்படுவதில்லை. இதனால் அவா்கள் நுரையீரல் நோய் தொற்று உள்ளிட்டவற்றால் அவதியுறுகின்றனா். சில நேரங்களில் வெடி விபத்தில் சிக்கி கை, கால்களை இழப்பதுடன், உயிரிழக்கும் சம்பவங்களும் நிகழ்ந்துகொண்டுதான் இருக்கிறது. மேலும் அவா்கள் எந்த ஒரு உடலுழைப்புத் தொழிலாளா்கள் நலவாரியத்திலும் இல்லாததால் இழப்பீடும் கிடைப்பதில்லை.

ஆகவே, குவாரிகளில் இதுபோன்ற விதிமீறல்களை கண்டுபிடித்து சம்பந்தப்பட்ட அதிகாரிகள் நடவடிக்கை எடுக்க வேண்டும். மேலும், குவாரி பணியாளா்களுக்கு பணிப் பாதுகாப்பு வழங்க வேண்டும். அவா்களை தொழிலாளா்கள் நலவாரியத்தில் சோ்த்து உரிய நலவாரிய பலன்கள் கிடைக்க நடவடிக்கை எடுக்க வேண்டும் என்றாா் அவா்.