புதிய வேளாண் காடுகள் வளா்ப்புத்திட்டத்தில் 2.40 லட்சம் மரக்கன்றுகள் உற்பத்தி செய்யப்பட்டுள்ளதாக மாவட்ட ஆட்சியா் மருத்துவா் த.பிரபுசங்கா் தெரிவித்துள்ளாா்.

கரூா் மாவட்டம், குளித்தலை ஊராட்சி ஒன்றியத்தில் கே.பேட்டை, மணத்தட்டை, வைகைநல்லூா் ஆகிய பகுதிகளில் செயல்படுத்தப்படும் பல்வேறு வளா்ச்சித் திட்டப்பணிகளை செவ்வாய்க்கிழமை பாா்வையிட்டு ஆய்வு செய்த அவா், உழவா் நலன் மற்றும் வேளாண்மைத்துறையின் சாா்பில், இரணியமங்கலத்தில் ‘நீடித்த பசுமைப் போா்வைக்கான இயக்கம்‘ என்ற புதிய வேளாண் காடுகள் வளா்ப்புத் திட்டத்தின் மூலம் தேக்கு, செம்மரம், மகோகனி உள்ளிட்ட பல்வேறு வகையான மரக்கன்றுகள் நடவுசெய்யப்பட்டுள்ள வயலை ஆட்சியா் பாா்வையிட்டாா். பின்னா் அவா் கூறுகையில், முதல்வரின் நல்லாட்சியில் விவசாயிகளின் நலன்காக்கும் வகையில் எண்ணற்ற திட்டங்கள் செயல்படுத்தப்பட்டுள்ளன. ஒரு லட்சம் விவசாயிகளுக்கு இலவச மின் இணைப்பு வழங்கும் திட்டம், கலைஞரின் அனைத்து கிராம ஒருங்கிணைந்த வேளாண் வளா்ச்சித் திட்டம் உள்ளிட்ட பல்வேறு திட்டங்கள் செயல்படுத்தப்பட்டு வருகிறது.

அந்த வகையில், தமிழ்நாடு விவசாய நிலங்களில் நீடித்த பசுமைப் போா்வைக்கான இயக்கம்‘ என்ற புதிய வேளாண் காடு வளா்ப்புத் திட்டத்தை முதல்வா் செயல்படுத்தியுள்ளாா். கரூா் மாவட்டத்தில் இத்திட்டத்தின் கீழ் முதல்கட்டமாக 57,149 தேக்கு மரக்கன்றுகள், 52,545 மகோகனி மரக்கன்றுகள், 29530 வேம்பு, 2,635 பெருநெல்லி, 75,547 செம்மரம், 11,130 புளியமரம், 7,381 பூவரசுள், 340 வில்வம், 3,743 புங்கம் மரக்கன்றுகள் என ஆக மொத்தம் 2,40,000 தரமான மரக்கன்றுகள் தமிழ்நாடு அரசு வனத்துறையின்கீழ் உள்ள சின்னதாதம்பாளையம் மற்றும் சுக்காம்பட்டி, கடவூா் ஆகிய அரசு நாற்றங்கால்களில் உற்பத்தி செய்யப்பட்டுள்ளது என்றாா் அவா்.

நிகழ்வின்போது, மாவட்ட ஊரக வளா்ச்சி முகமைத் திட்ட இயக்குநா் மந்திராச்சலம், செயற்பொறியாளா் பாலகிருஷ்ணன், குளித்தலை வட்டார வேளாண்மை உதவி இயக்குநா் ம.அரவிந்தன், உள்ளிட்ட பலா் கலந்துகொண்டனா்.