நொய்யல் வட்டாரத்தில் உள்ள சிவன் கோயில்களில் சித்திரை மாத பிரதோஷ வழிபாடு வியாழக்கிழமை நடைபெற்றது.

கரூா் மாவட்டம், நஞ்சை புகளூரில் உள்ள கபாலீஸ்வரா் கோயிலில் சித்திரை மாத பிரதோஷத்தை முன்னிட்டு வியாழக்கிழமை நந்தி பகவானுக்கு 18 வகையான வாசனை திரவியங்களால் சிறப்பு அபிஷேகம் நடைபெற்றது. தொடா்ந்து மலா்களால் அலங்காரம் செய்யப்பட்டு தீபாராதனை காட்டப்பட்டது.

பின்னா் சுவாமி ரிஷப வாகனத்தில் சிறப்பு அலங்காரத்தில் எழுந்தருளினாா்.

அதேபோல், புன்னம் பகுதியில் உள்ள புன்னைவன நாதா் உடனுறை புன்னைவன நாயகி கோயிலில் உள்ள நந்தி பகவானுக்கு சிறப்பு அபிஷேக, ஆராதனை நடைபெற்றது . குந்தாணி பாளையம் நத்தமேட்டில் உள்ள சிவன் கோயில், திருக்காடுதுறையில் உள்ள மாதேஸ்வரி உடனுறை மாதேஸ்வரன் கோயில் மற்றும் நொய்யல் சுற்றுவட்டார பகுதிகளில் உள்ள சிவன் கோயில்களில் சிறப்பு அபிஷேக ஆராதனை நடைபெற்றது. இதில் பக்தா்கள் திரளாக பங்கேற்றனா்.