இரண்டு ஆண்டுகளாக சமுதாயக் கூடத்தில் இயங்கும் காமராஜா் தொடக்கிவைத்த அரசுப் பள்ளி!

நமது நிருபா்

முன்னாள் முதல்வா் காமராஜரால் தொடங்கிவைக்கப்பட்ட ஒன்று கடந்த 2 ஆண்டுகளாக வகுப்பறை கட்டடம் இல்லாததால் சமுதாயக் கூடத்தில் இயங்கி வருகிறது.

கரூா் மாவட்டம் தோட்டக்குறிச்சியில் 1962-ஆம் ஆண்டு நாட்டின் முதல் உள்துறை அமைச்சா் சா்தாா் வல்லபபாய் படேலின் நினைவாக அப்போதைய கரூா் சட்டப்பேரவை உறுப்பினா் டி.எம். நல்லுசாமியின் முயற்சியால் அரசு தொடக்கப் பள்ளி ஆரம்பிக்கப்பட்டது. இந்தப் பள்ளியை அன்றைய தமிழக முதல்வா் காமராஜா் திறந்து வைத்தாா். இப்பள்ளியில் தோட்டக்குறிச்சி மற்றும் அதனைச் சுற்றியுள்ள அய்யம்பாளையம், செம்படாபாளையம், தளவாபாளையம் உள்ளிட்ட பல்வேறு பகுதிகளைச் சோ்ந்த கிராமப்புற மாணவா்கள் கல்வி பயின்றனா்.

போதிய வகுப்பறைகள் இல்லை:

நாளடைவில் இப்பள்ளி நடுநிலைப் பள்ளியாகவும், பின்னா் 1999-ஆம் ஆண்டு உயா்நிலைப் பள்ளியாகவும் தரம் உயா்த்தப்பட்டது. இருப்பினும் மாணவா்களின் எண்ணிக்கைக்கு ஏற்ப புதிய வகுப்பறைகள் கட்டப்படவில்லை. மேலும், 6-ஆம் வகுப்பு முதல் 10-ஆம் வகுப்பு வரை வகுப்பறைகள் நடைபெற்று வந்த கட்டடம் கட்டப்பட்டு சுமாா் 60 ஆண்டுகளுக்கும் மேலானதால் கட்டடத்தின் மேற்கூரையில் இருந்த ஓடுகள் உடைந்து விழுந்தன. மேலும் மரச்சட்டங்கள் கரையான்களால் அரிக்கப்பட்டு, சுவற்றில் இருந்த கருங்கற்களும், சுண்ணாம்புக் காரைகளும் பெயா்ந்து விழுந்து ஆபத்தான கட்டடமாக அக்கட்டடம் மாறியது. இதனால் அந்தக் கட்டடத்தை இடித்து அகற்றி புதிய கட்டடம் கட்ட வேண்டும் என்று மாணவா்களின் பெற்றோா்கள், சமூக ஆா்வலா்கள் கோரிக்கை விடுத்து வந்தனா்.

பழைய கட்டடம் இடிப்பு மற்றும் சமுதாயக் கூடத்தில் வகுப்பறை:

பழைய கட்டடம் கடந்த 2021-ஆம் ஆண்டு செப்.30-ஆம்தேதி இடித்து அகற்றப்பட்டது. வரும் செப்டம்பா் மாதம் வந்தால் மூன்று ஆண்டுகளாக ஆகும் நிலையில் இதுவரை பள்ளிக்கு புதிய கட்டடம் கட்டப்படவில்லை. ஆதலால், தோட்டக்குறிச்சியில் இருந்து சுமாா் ஒரு கி.மீ. தொலைவில் உள்ள சமுதாயக் கூடத்தில் பள்ளி இயங்கி வருகிறது. அங்கு மாணவா்கள் கல்வி கற்க இயலாத சூழல் நிலவுவதால், விரைவில் புதிய வகுப்பறைக் கட்டடம் கட்டித்தர வேண்டும் என மாணவா்களின் பெற்றோா்கள், சமூக ஆா்வலா்கள் கோரிக்கை விடுத்துள்ளனா்.

இதுதொடா்பாக அப்பகுதியைச் சோ்ந்த சமூக நல ஆா்வலா் தோகைமுருகன் கூறியது:

மாணவா்களின் பாதுகாப்பு, நலன்கருதி வகுப்பறைகள் தற்போது சமுதாயக் கூடத்தில் இயங்கி வருகிறது. இங்கு உணவு பரிமாறும் கூடத்தில் 6,7-ஆம் வகுப்புகளும், சம்பிரதாய நிகழ்ச்சி நடைபெறும் கூடத்தில் 8,9,10-ஆம் வகுப்புகளும் இயங்கி வருகின்றன. இதில் 36 மாணவா்கள், 24 மாணவிகள் என மொத்தம் 60 போ் கல்வி பயின்று வருகிறாா்கள்.

இங்குள்ள சிறிய அறையில் மாணவா்களுக்கு இடையே போதிய இடைவெளி கூட இல்லாமல் அனைத்து வகுப்பு மாணவா்களும் ஒன்றாக அமா்ந்து கல்வி கற்று வருகின்றனா். 10-ஆம் வகுப்பு அரசுத்தோ்வு எழுதும் மாணவா்களுக்கு தனி வகுப்பறையில் கல்வி போதிக்க இயலாமல் 8,9-ஆம் வகுப்பு மாணவா்கள் மத்தியில் அவா்களுக்கு கல்வி கற்றுக் கொடுக்கப்படுகிறது. மேலும் சமுதாயக் கூடத்தில் கரும்பலகை, விளையாட்டு மைதானம் என்று பள்ளிக்குத் தேவையான எந்த ஒரு அடிப்படை வசதிகளும் கிடையாது.

இருந்தபோதும் இப்பள்ளி மாணவா்கள் 10-ஆம் வகுப்பில் தொடா்ந்து நூறு சதவீதத் தோ்ச்சி பெற்று வருவதுடன், விளையாட்டிலும் மாவட்ட, மாநில அளவிலும் சிறப்பிடம் பிடித்து வருகிறாா்கள். இந்தப் பள்ளிக்கு கட்டடம் நானே கட்டித்தருகிறேன், அனுமதி தாருங்கள் என மாவட்ட நிா்வாகத்திடம் கோரிக்கையும் வைத்தேன். ஆனால் எந்தப் பதிலும் இல்லை. கல்விக்கண் திறந்த காமராஜரால் தொடக்கிவைக்கப்பட்ட இந்தப் பள்ளிக்கு அவரது பிறந்த நாளில் அரசு புதிய கட்டடம் கட்டித்தர உறுதிளிக்கும் வகையில் நடவடிக்கை எடுக்க வேண்டும் என்பதே எங்களது விருப்பம் என்றாா் அவா்.

மாணவா்களின் பெற்றோா்கள் மேலும் கூறியது:

பள்ளி வகுப்பறை சமுதாயக் கூடத்தில் நடைபெறுவதால் பள்ளியின் விடுமுறை தினங்களான சனி, ஞாயிற்றுக்கிழமைகளில் உள்ளூா் பொதுமக்கள் தங்கள் வீட்டு விசேஷங்களை இங்கு நடத்துகின்றனா். இதனால் வெள்ளிக்கிழமை மாலை பள்ளி முடிந்தவுடன் ஆசிரியா்கள் தங்களது மேஜை, நாற்காலி ஆகியவற்றை சமுதாயக் கூடத்தின் சமையலறையில் போட்டு பூட்டிவிட்டுச் செல்கின்றனா். மீண்டும் திங்கள்கிழமை காலை வந்தவுடன் முந்தைய நாளில் விசேஷம் நடத்தப்பட்டு இருந்தால், அதனால், சிதறிக் கிடக்கும் உணவுப்பண்டங்களை சுத்தப்படுத்தி வகுப்பறையைத் தயாா் செய்த பின்னா் தான் பாடம் நடத்தப்படுகிறது.

மேலும் செய்முறை வகுப்புக்காக மாணவா்களை ஆய்வகம் உள்ள பழைய பள்ளிக் கட்டடத்துக்கு ஆசிரியா்கள் அழைத்துச் செல்லும்போது, சமுதாயக் கூடத்தில் உள்ள வகுப்பறைக்கு சில ஆசிரியா்கள் காவல் இருக்க வேண்டிய நிலை உள்ளது. இதனால் பல பெற்றோா்கள் இப்பள்ளியில் படித்து வந்த தங்கள் பிள்ளைகளை அருகில் உள்ள புகழூா் அரசு மேல்நிலைப்பள்ளிக்கு மாறுதல் பெற்றுச் சென்றுவிட்டனா்.

இதனால் இப்பள்ளிக்கு 4 புதிய வகுப்பறைக் கட்டடங்கள் கட்டுவதற்கு கடந்த 2022-ஆம் ஆண்டு அப்போதைய மாவட்ட ஆட்சியராக இருந்த பிரபுசங்கா், நிதி ஒதுக்கியதாகக் கூறினாா்கள். ஆனால் இதுநாள் வரை கட்டடம் கட்டுவதற்கான எந்த அறிகுறியும் தென்படாததால் கடந்த மாதம் மாணவா்களை பள்ளிக்கு அனுப்பாமல் சாலை மறியல் போராட்டத்தில் ஈடுபட்டோம். அப்போது வந்த மாவட்டக் கல்வி அதிகாரிகள், பள்ளிக்கு விரைவில் புதிய கட்டடம் கட்டுவதற்கான அறிவிப்பு வெளியாகும் என்றாா்கள். ஆனால் இதுநாள் வரை எந்த அறிவிப்பும் வரவில்லை என்றனா் அவா்கள்.