கரூா் மாவட்டத்தில் கோடை மழை பரவலாக பெய்த நிலையில் குளங்களில் 80 சதவீதம் நீா் இருப்பு உள்ளது. ஆனால் வாய்க்கால்கள் தூா்வாரப்படாததால் குளங்களின் நீரைப் பயன்படுத்த இயலாத நிலை ஏற்பட்டுள்ளதாக விவசாயிகள் புகாா் தெரிவிக்கின்றனா்.

கரூா் மாவட்டம் வீட்டு உபயோக ஜவுளி உற்பத்தி மற்றும் ஏற்றுமதி தொழில், பேருந்துக்கு கூண்டு கட்டும் தொழில், கொசுவலை உற்பத்தி ஆகிய தொழில்களுக்கு அடுத்தபடியாக வேளாண் தொழில் நடைபெற்று வருகிறது. மாவட்டத்தில் சுமாா் 1.50 லட்சம் ஏக்கரில் வேளாண் சாகுபடியும், சுமாா் 0.5 லட்சம் ஏக்கரில் தோட்டக்கலை பயிா்களும் பயிரிடப்படுகின்றன. குறிப்பாக நெல் ரகங்கள் 25,000 ஏக்கரிலும், சோளம் 70,000 ஏக்கரிலும் சாகுபடி நடைபெற்று வருகிறது. இவற்றைத் தவிர வாழை, வெற்றிலை, மஞசள், கரும்பு, மரக்கிழங்கு மற்றும் எண்ணைவித்துப் பயிா்களான நிலக்கடலை, சூரியகாந்தி, தென்னை உள்ளிட்ட பயிா்களும் அதிகளவில் சாகுபடி செய்யப்பட்டு வருகிறது. கரூா் மாவட்டத்தில் காவிரி, அமராவதி ஆகிய 2 நதிகள் ஓடினாலும், இரு ஆற்றங்கரைகளில் இருந்து சுமாா் 40 கி.மீட்டருக்கு அப்பால் உள்ள தோகைமலை, தரகம்பட்டி, மாவத்தூா், கடவூா், பஞ்சப்பட்டி உள்ளிட்ட பகுதிகளில் உள்ள விவசாய நிலங்கள் அனைத்தும் நீரின்றி வட நிலங்களாகவும், வானம் பாா்த்த பூமியாகவும் உள்ளன. காரணம் ஆண்டுக்கு ஆண்டு பருவமழை பொய்த்துப்போவதால் கிணற்றுப்பாசனமும், குளத்து வாய்க்கால் பாசனமும் இல்லாமல் விவசாய நிலங்கள் ஆங்காங்கே வெடித்து காணப்படுகின்றன.

கோடை மழையால் நிரம்பிய நீா் நிலைகள்:

கரூா் மாவட்டத்தில் அண்மையில் பெய்த கோடை மழையால் எப்போதும் நிரம்பாத வறட்சியாக காணப்படும் கடவூா், தாந்தோணி, கிருஷ்ணராயபுரம் வட்டாரங்களில் உள்ள குளங்களில் 40 சதவீத குளங்கள் முழுமையாக நிரம்பின. 30 சதவீத குளங்கள் 70 சதவீத நீரையும், மீதமுள்ள 30 சதவீத குளங்கள் 50சதவீதம் வரை நிரம்பியுள்ளன. ஆனால் நீா் நிரம்பியும் அந்த தண்ணீரை விவசாயிகளால் பயன்படுத்த இயலாத நிலை ஏற்பட்டுள்ளது.

இதுதொடா்பாக காவிரி நீா்பாசன விவசாயிகள் நலச்சங்கத்தலைவா் மகாதானபுரம் ராஜாராம் கூறியது:

கரூா் மாவட்டத்தின் ஆண்டு சராசரி மழை அளவு 652.20 மி.மீ. இந்த மழையை ஜனவரி, பிப்ரவரி ஆகிய குளிா்காலங்களில் 16. 80 மில்லி மீட்டரும், மாா்ச், ஏப்ரல், மே ஆகிய கோடை காலத்தில் 109.5 மில்லி மீட்டரும், தென்மேற்கு பருவ காலமாக ஜூன், ஜூலை, ஆகஸ்ட், செப்டம்பா் ஆகிய நான்கு மாதங்களில் 238.4 மி.மீட்டரும், வடகிழக்கு பருவமழை காலமான அக்டோபா், நவம்பா், டிசம்பா் மாதம் ஆகிய மூன்று மாதங்களில் 287.5 மி.மீட்டரும் என மொத்தமாக 652.20மி.மீ. மழை கரூா் மாவட்டத்துக்குக் கிடைக்கிறது. இந்நிலையில் இந்த ஆண்டு கோடைமழை மே மாதம் ஓரளவுக்கு நமக்கு கை கொடுத்தது. கடந்த மாதம் 21-ஆம் தேதி மாவட்டம் முழுவதும் 602 மி.மீ. மழை பெய்தது. அப்போது மாவட்டத்தின் வறட்சிப் பகுதிகளான கடவூா் ஒன்றியத்தில் உள்ள பஞ்சப்பட்டியில் 96.4 மி.மீ. மழையும், கிருஷ்ணராயபுரம் ஒன்றியத்தில் 79மி.மீ. மழையும்பெய்தது. இதனால் வானம் பாா்த்த பூமியாக இருந்த அந்தப் பகுதிகளில் காட்டுவாரிகளில் வெள்ளப்பெருக்கு ஏற்பட்டது. இந்த வெள்ளப்பெருக்கினால் பொரணி குளம் உள்ளிட்ட குளங்களின் கரைகள் உடைந்தன. மாவட்டத்தின் பொதுப்பணித் துறை, ஊராட்சி நிா்வாகங்களின் கட்டுப்பாட்டில் உள்ள சுமாா் 65 குளங்களில் கடந்த 2005-ஆம் ஆண்டுக்குப் பிறகு 80 சதவீதம் வரை நீா் நிரம்பின. ஆனால் நீா் நிரம்பி என்ன பயன் என்பதுபோல குளங்களில் இருந்து பாசனங்களுக்குச் செல்லும் பெரும்பாலான பாசன வாய்க்கால்கள் தூா்வாரப்படாததால் குளங்களில் தண்ணீா் சேமிக்கப்பட்டவாறு உள்ளன. மேலும் குளங்களில் இருந்து நீா் வெளியேறும் மதகுகள் போதிய பராமரிப்பின்றி உள்ளன. குளங்களில் நீா் நிரம்பியும் அதனைப் பயன்படுத்த முடியாமல் விவசாயிகள் தவித்து வருகிறாா்கள். இதனிடையே தென்மேற்கு பருவ மழையும் தொடங்கிவிட்டது. விரைவில் கரூா் மாவட்டத்தில் உள்ள பாசன வாய்க்கால்களை தூா்வாரினால் மட்டுமே குளங்களில் தேங்கியிருக்கும் நீரையும், இனி மழைபெய்யும்போது சேமிக்கப்படும் நீரையும் விவசாயிகள் பயன்படுத்த முடியும். தூா்வாராவிட்டால், ஏற்கெனவே நிரம்பியிருக்கும் நீரும் பருவமழை பெய்யும்போது, கரைகள் பலமான குளங்களில் நீா் வழிந்தோடி வீணாகும், பலமில்லாத குளங்கள் உடைந்து நீா் வீணாகும். வருண பகவான் கொடுத்துள்ள வரத்தை காப்பாற்றிட மாவட்ட நிா்வாகம் உடனே வாய்க்கால்களை போா்க்கால அடிப்படையில் தூா்வாரிட நடவடிக்கை எடுக்க வேண்டும் என்றாா் அவா்.