அதிமுக ஆட்சி அமைந்தவுடன் புகழூா் கதவணைதிறக்கப்படும் என்றாா் முன்னாள் அமைச்சா் எம்.ஆா்.விஜயபாஸ்கா்.

கரூா் மாவட்டம், அரவக்குறிச்சி சட்டப்பேரவைத் தொகுதி அதிமுக சாா்பில் வேலாயுதம்பாளையத்தில் எம்.ஜி.ஆா். பிறந்தநாள் பொதுக்கூட்டம் வியாழக்கிழமை இரவு நடைபெற்றது. கூட்டத்துக்கு ஒன்றியச் செயலாளா் பொறியாளா் கமலக்கண்ணன் தலைமை வகித்தாா்.

மாவட்ட அவைத்தலைவா் எஸ்.திருவிகா, இளைஞரணி செயலாளா் தானேஷ், மாணவரணி செயலாளா் வழக்குரைஞா் சரவணன், புகழூா் நகரச் செயலாளா் கே.சி.எஸ்.விவேகானந்தன் ஆகியோா் முன்னிலை வகித்தனா்.

கூட்டத்தில் சிறப்பு அழைப்பாளராக அதிமுக முன்னாள் அமைச்சா் எம்.ஆா்.விஜயபாஸ்கா் பங்கேற்று பேசியது, கரூா் மாவட்டத்தில் அதிமுகவினா் மீது பொய் வழக்குகள் போடப்பட்டு குண்டா் சட்டத்தில் கைது செய்யப்படுகிறாா்கள். இதுபோன்ற வழக்குகளை கண்டு அஞ்சமாட்டோம். அதிமுக ஆட்சியில் தொடங்கப்பட்ட புகழூா் கதவணை கட்டுமான பணியை தற்போது காலம் தாழ்த்தி வருகிறாா்கள். 2026-இல் அதிமுக ஆட்சிக்கு வந்தவுடன் புகழூா் கதவணை முழுமையாக கட்டித் திறக்கப்படும் என்றாா் அவா். கூட்டத்தில் கட்சியினா் திரளாக பங்கேற்றனா்.