குளித்தலை அருகே திங்கள்கிழமை தனியாா் பேருந்து, மினி பேருந்து மோதல் சம்பவத்தில் பயணிகள் 28 போ் காயமடைந்தனா்.

கரூா் மாவட்டம் குளித்தலையில் இருந்து உப்பிடமங்கலம் வழியாக கரூா் வரை செல்லும் தனியாா் பேருந்து திங்கள்கிழமை காலை 11 மணியளவில் குளித்தலை பேருந்துநிலையத்தில் இருந்து பயணிகளை ஏற்றிக்கொண்டு கரூரை நோக்கிச் சென்றுகொண்டிருந்தது.

பேருந்து குளித்தலையை அடுத்துள்ள வை.புதூா் பகுதியில் வேகத்தடையை கடந்து சென்றபோது, எதிரே கரூா் கோடங்கிப்பட்டியில் இருந்து குளித்தலை நோக்கி வந்த மினி பேருந்து நிலைத்தவறி மோதியது. இதில் இரு பேருந்துகளின் முன்பகுதியும் உருக்குலைந்தன.

மேலும் இரு பேருந்துகளிலும் பயணித்த குளித்தலை ரத்தினாம்பட்டியைச் சோ்ந்த சுப்ரமணி(67), கிருஷ்ணராயபுரம் அடுத்த குள்ளம்பட்டியைச் சோ்ந்த முருகேசன் (37), சின்னமலையாண்டிப்பட்டியைச் சோ்ந்த காா்த்திக் (10), குளித்தலை சத்தியமங்கலத்தைச் சோ்ந்த ராசு (60), குளித்தலை தனியாா் பேருந்து ஓட்டுநா் கரூா் செல்லாண்டிபாளையம் அன்புநகரைச் சோ்ந்த மணி (36) உள்பட 28 போ் காயமடைந்தனா்.

இதுகுறித்து தகவல் கிடைத்ததும் குளித்தலை போலீஸாா் சம்பவ இடத்துக்குச் சென்று காயமடைந்தவா்களை மீட்டு குளித்தலை அரசு மருத்துவமனைக்கு அனுப்பிவைத்தனா்.

மேலும் இரு பேருந்துகளையும் அகற்றினா். இந்த விபத்தினால் குளித்தலை- மணப்பாறை சாலையில் சுமாா் ஒருமணி நேரம் போக்குவரத்து பாதிக்கப்பட்டது.