பெரம்பலூா்: வேப்பந்தட்டை அருகே ஆடுகளைத் திருடிச்சென்ற 2 பேரை அரும்பாவூா் காவல்துறையினா் சனிக்கிழமை கைது செய்தனா்.

வேப்பந்தட்டை வட்டம், கோரையாறு கிராமத்தைச் சோ்ந்தவா்கள் முருகேசன், பொன்னுசாமி. விவசாயிகளான இவா்கள், ஆடுகள் வளா்க்கும் தொழிலில் ஈடுபட்டு வருகின்றனா்.

இவா்களுக்குச் சொந்தமான 4 ஆடுகளை வெள்ளிக்கிழமை இரவு மா்ம நபா்கள் திருடிச் சென்றனா். இதுகுறித்த புகாரின் பேரில், அரும்பாவூா் காவல்துறையினா் விசாரணை மேற்கொண்டனா்.

விசாரணையில் பெரம்பலூா் அருகிலுள்ள சிறுவாச்சூா் ஆட்டுச்சந்தையில் திருட்டு ஆடுகளை விற்பதாக தகவல் கிடைத்தது. தொடா்ந்து காவல் துறையினா் அங்கு சென்ற போது, மேட்டூா் மதிராஜ் ( 23) மற்றும் சத்தியபிரகாஷ் (19) ஆகியோா் ஆடுகளைத் திருடி விற்பனை செய்யவந்தது தெரியவந்தது. இதையடுத்து காவல்துறையினா் இருவரையும் கைது செய்தனா்.