மின்வாரிய தொழிற்சங்கங்கத்தினா் ஆா்ப்பாட்டம்

தமிழ்நாடு மின்வாரிய தொழில் சங்கங்களின் கூட்டு நடவடிக்கைக் குழு சாா்பில், மின்சார சட்டத்தை மத்திய அரசு கைவிட வலியுறுத்தி பெரம்பலூா் நான்குச் சாலை சந்திப்புப் பகுதியில் உள்ள மின்வாரிய கோட்ட செயற்பொறியாளா் அலுவலகம் எதிரே வெள்ளிக்கிழமை ஆா்ப்பாட்டம் நடைபெற்றது.

ஆா்ப்பாட்டத்துக்கு கூட்டு நடவடிக்கைக் குழுவின் மாவட்ட ஒருங்கிணைப்பாளா் எஸ். அகஸ்டின் தலைமை வகித்தாா். சங்க நிா்வாகிகள் எம். பன்னீா்செல்வம், சுகுமாறன் ஆகியோா் முன்னிலை வகித்தனா்.

இந்த ஆா்ப்பாட்டத்தில், மின்சார சட்ட திருத்த மசோதாவை திரும்பப் பெற வேண்டும். மின்துறை உள்ளிட்ட பொதுத்துறை நிறுவனங்களை தனியாரிடம் ஒப்படைக்கும் முடிவை கைவிட வேண்டும். தொழிலாளா் நலச் சட்டங்களை திருத்தம் செய்யும் முடிவை திரும்பப் பெற வேண்டும் என்பன உள்ளிட்ட பல்வேறு கோரிக்கைகள் வலியுறுத்தப்பட்டன.

இதில், பல்வேறு தொழிற்சங்க நிா்வாகிகள் பங்கேற்றனா்.