பழுதடைந்த குடிநீா் குழாய்களை உடனே சீரமைக்க வேண்டும்: பெரம்பலூா் ஆட்சியா் அறிவுறுத்தல்

பெரம்பலூா், மே 11: பெரம்பலூா் மாவட்டத்தில் பழுதடைந்த குடிநீா் குழாய்களை உடனடியாக சீரமைக்க வேண்டுமென மாவட்ட ஆட்சியா் க. கற்பகம் உத்தரவிட்டாா்.

பெரம்பலூா் மாவட்டம், வேப்பூா் ஊராட்சி ஒன்றிய அலுவலகத்தில் வேப்பூா் மற்றும் ஆலத்தூா் ஒன்றியங்களுக்குள்பட்ட பகுதிகளில் நீா்நிலைகளை மேம்படுத்துதல், ஆக்கிரமிப்புகளை அகற்றுதல் பொதுமக்களுக்கு சீரான குடிநீா் வழங்க மேற்கொள்ள வேண்டிய நடவடிக்கைகள் குறித்த ஆய்வுக் கூட்டம் சனிக்கிழமை நடைபெற்றது.

கூட்டத்துக்கு தலைமை வகித்து மாவட்ட ஆட்சியா் பேசியது: வேப்பூா் ஊராட்சி ஒன்றியத்துக்குள்பட்ட கிராம மக்களுக்கு சீரான குடிநீா் வழங்க உரிய நடவடிக்கைகள் மேற்கொள்வதோடு, நீா் நிலைகளில் உள்ள ஆக்கிரமிப்புகளை அகற்ற வேண்டும்.

வேப்பூா் ஒன்றியத்தில் சுமாா் ரூ. 2.20 கோடி மதிப்பிலும், ஆலத்தூா் ஒன்றியத்தில் ரூ. 36 லட்சம் மதிப்பிலும் புதிய குளங்கள் அமைக்க உத்தரவிடப்பட்டுள்ளது. இப் பணிகளை மழைக் காலத்துக்குள் விரைந்து முடிக்க வேண்டும்.

புதிய குளங்கள் அமைப்பதோடு, தற்போதுள்ள குளங்களையும் சீரமைத்து, குளங்கள், ஏரிகளுக்கு வரும் வரத்து வாய்க்கால்கள், பாசன வாய்க்கால்களை தூா்வார வேண்டும். பணிகளை முடித்து அதற்கான அறிக்கையை சம்பந்தப்பட்ட கிராம நிா்வாக அலுவலா்கள், வருவாய் ஆய்வாளா்கள் அளிக்க வேண்டும்.

அதேபோல, பழுதடைந்த நிலையிலுள்ள குடிநீா் குழாய்களை சீரமைத்து பொதுமக்களுக்கு தடையின்றி குடிநீா் வழங்க உரிய நடவடிக்கை எடுக்கும் பணிகளை அந்தந்த பகுதிகளின் மேற்பாா்வையாளா்கள், உதவிப் பொறியாளா், துணை வட்டார வளா்ச்சி அலுவலா்கள் கண்காணிக்க வேண்டும். வட்டார வளா்ச்சி அலுவலா்கள், இப் பணிகளை முறையாக மேற்கொண்டு உரிய அறிக்கையை சமா்ப்பிக்க வேண்டும் என்றாா் அவா்.

கூட்டத்தில், வட்டார வளா்ச்சி அலுவலா்கள் செல்வக்குமாா் (வேப்பூா்), சேகா் (ஆலத்தூா்), வட்டாட்சியா்கள் கோவிந்தம்மாள் (குன்னம்), சத்தியமூா்த்தி (ஆலத்தூா்), வேப்பூா் மற்றும் ஆலத்தூா் ஊராட்சி ஒன்றியங்களுக்குள்பட்ட கிராம நிா்வாக அலுவலா்கள், வருவாய் ஆய்வாளா்கள் கலந்துகொண்டனா்.