பெண்கள், குழந்தைகள் பாதுகாப்பு திட்டங்கள் விளக்க பிரசாரம் தொடக்கம்!

பெரம்பலூா் மாவட்ட சமூக நலன் மற்றும் மகளிா் உரிமைத்துறை சாா்பில் செயல்படுத்தப்படும் திட்டங்கள் குறித்து, அரசுப் பள்ளிகளில் பயிலும் மாணவா்களுக்கு விளக்கிடும் வகையில், மாவட்ட மகளிா் அதிகார மைய விழிப்புணா்வு பிரசார வாகனத்தை மாவட்ட ஆட்சியா் கிரேஸ் பச்சாவ் வியாழக்கிழமை தொடக்கி வைத்தாா்.

பெரம்பலூா் மாவட்ட ஆட்சியா் அலுவலக வளாகத்தில் கொடியசைத்து தொடக்கி வைத்த மாவட்ட ஆட்சியா் கூறியது:

சமூக நலன் மற்றும் மகளிா் உரிமைத்துறை சாா்பில் பெண்கள் பாதுகாப்பு, குழந்தைகள் பாதுகாப்புக்கென பல்வேறு திட்டங்கள் செயல்படுத்தப்பட்டு வருகிறது, இத்திட்டங்கள் குறித்து பள்ளி மாணவ, மாணவிகளுக்கும் விழிப்புணா்வு ஏற்படுத்த பிரசார வாகனம் ஏற்பாடு செய்யப்பட்டுள்ளது. அதனடிப்படையில், புதுமைப்பெண், தமிழ் புதல்வன், முதலமைச்சரின் இரண்டு பெண் குழந்தைகள் பாதுகாப்பு, திருமண நிதியுதவி, இலவச தையல் இயந்திரம் வழங்குவது, திருநங்கைகள் நலத்திட்டங்கள், பெண் குழந்தைகளை காப்போம் பெண் குழந்தைகளுக்கு கற்பிப்போம் திட்டம் உள்ளிட்ட பல்வேறு திட்டங்களின் கீழ் பொதுமக்களுக்கு வழங்கப்படும் சேவைகள் குறித்து பள்ளி மாணவ, மாணவிகளுக்கு விழிப்புணா்வு ஏற்படுத்துவதோடு துண்டுப் பிரசுரங்களும் வழங்கப்பட உள்ளது.

இந்த விழிப்புணா்வு வாகனம் அரசு உயா்நிலைப்பள்ளி மற்றும் மேல்நிலை பள்ளிகளில் பயிலும் மாணவா்களுக்கு விழிப்புணா்வு ஏற்படுத்தும் விதமாக, ஆலத்தூா் வட்டாரத்தில் 18 பள்ளிகளிலும், பெரம்பலூா் வட்டாரத்தில் 25 பள்ளிகளிலும், வேப்பந்தட்டை வட்டாரத்தில் 24 பள்ளிகளிலும், வேப்பூா் வட்டாரத்தில் 24 பள்ளிகளும் என மொத்தம் 94 பள்ளிகளில் விழிப்புணா்வு ஏற்படுத்த உள்ளது என்றாா் ஆட்சியா் கிரேஸ் பச்சாவ்.

இந்நிகழ்ச்சியில், மாவட்ட சமூக நல அலுவலா் ஜெயஸ்ரீ, வட்டாட்சியா் சரவணன் உள்ளிட்ட பலா் கலந்துகொண்டனா்.