‘உங்களைத்தேடி உங்கள் ஊரில்’ திட்டம் சிறுமத்தூரில் ஆட்சியா் ஆய்வு

‘உங்களைத் தேடி உங்கள் ஊரில்’ திட்டத்தின் கீழ், பெரம்பலூா் மாவட்டம், குன்னம் வட்டம், சிறுமத்தூா் ஊராட்சியில் அரசின் திட்டப் பணிகள், அடிப்படை வசதிகள் குறித்து மாவட்ட ஆட்சியா் கிரேஸ் பச்சாவ் வியாழக்கிழமை ஆய்வு மேற்கொண்டாா்.

இந்த ஆய்வில், முருக்கன்குடி கிராமத்திலுள்ள பால் உற்பத்தியாளா் கூட்டுறவுச் சங்கத்தில் உற்பத்தியாளா்களுக்கு வழங்கப்படும் ஊதியம் குறித்து கேட்டறிந்த ஆட்சியா், ஊரக வளா்ச்சி மற்றும் ஊராட்சித் துறை சாா்பில் ஜல்ஜீவன் மிஷன் திட்டத்தின் கீழ் ரூ. 22 லட்சம் மதிப்பீட்டில் கட்டப்பட்டு வரும் மேல்நிலை நீா் தேக்கத்தொட்டி மற்றும் தூய்மை பாரதம் இயக்கத் திட்டத்தின் கீழ் ரூ. 1.40 லட்சம் மதிப்பீட்டில் கட்டப்பட்டு வரும் சுகாதார வளாகத்தைப் பாா்வையிட்டு பணிகளை விரைந்து முடித்து பொதுமக்கள் பயன்பாட்டுக்குக் கொண்டுவர வேண்டுமென சம்பந்தப்பட்ட அலுவலா்களுக்கு அறிவுறுத்தினாா்.

தொடா்ந்து, முருக்கன்குடி அரசு உயா்நிலைப்பள்ளி அருகே மாவட்ட ஊராட்சி மாநில நிதிக் குழு மானியத்தின் கீழ் ரூ. 3 லட்சம் மதிப்பீட்டில் அமைக்கப்பட்டுள்ள பாலம், சிமென்ட் சாலை பணிகளையும், புது காலனியில் பிரதம மந்திரி முன்னோடி கிராமத் திட்டத்தின் கீழ் ரூ. 10 லட்சம் மதிப்பீட்டில் அமைக்கப்பட்டுள்ள தாா் சாலை பணிகளின் தரம், கலைஞரின் கனவு இல்லத் திட்டத்தின் கீழ் கட்டப்பட்டு வரும் பயனாளிகளின் வீடுகளின் மேற்கொள்ளப்பட்டு வரும் பணிகளைப் பாா்வையிட்டு ஆய்வு மேற்கொண்ட ஆட்சியா், முருக்கன்குடி ஊராட்சி ஒன்றிய தொடக்கப்பள்ளியில் முதலமைச்சரின் காலை உணவுத் திட்டத்தில் வழங்கப்படும் உணவின் தரம் மற்றும் சுவை குறித்து மாணவா்களுடன் அமா்ந்து உணவருந்தினாா்.

பின்னா், சுத்திகரிக்கப்பட்ட குடிநீா் நிலையத்தின் மூலம் பொது மக்களுக்கு குடிநீா் வழங்கப்பட்டு வருவதையும், பகுதிநேர நூலகத்தில் நூல்களின் இருப்பு நிலை மற்றும் பாா்வையாளா்களின் வருகை பதிவேடுகளை பாா்வையிட்டு ஆய்வு மேற்கொண்டாா் கிரேஸ் பச்சாவ்.

இந்நிகழ்ச்சிகளில், வேப்பூா் வட்டார வளா்ச்சி அலுவலா் செல்வகுமாா், குன்னம் வட்டாட்சியா் கோவிந்தம்மாள் உள்ளிட்ட பலா் உடனிருந்தனா்.