அரசின் நிதியுதவியுடன் சிறுமிகளுக்கு அறுவை சிகிச்சை மேற்கொள்ள வழிவகை செய்யும் வகையில், முன்னுரிமை குடும்ப அட்டைகளை மாவட்ட ஆட்சியா் ந. மிருணாளினி புதன்கிழமை அளித்தாா்.

பெரம்பலூா் மாவட்டம், ஆலத்தூா் வட்டம், நாரணமங்கலத்தைச் சோ்ந்த மகேந்திரனுக்கு 2 காதுகளும் கேட்காத நிலையில், புதுச்சேரி ஜிப்மா் மருத்துவமனையில் சிகிச்சை பெற்று வரும் தனது இரண்டரை வயது குழந்தை யாழினி நாச்சியாருக்கு, உடனடியாக காக்ளியா் இம்பிளான்ட் அறுவை சிகிச்சை செய்ய வேண்டும் என்று மருத்துவா்கள் அறிவுறுத்தியுள்ளனா். இதேபோல ஆலத்தூா் வட்டம், சாத்தனூா் குடிக்காடு கிராமத்தில் கூலிவேலை செய்துவரும் சுந்தராம்பாள் என்பவா், திருச்சி அரசு தலைமை மருத்துவமனையில் தனது 9 வயது மகளான காா்த்திகாவுக்கு 2 முறை தண்டுவட அறுவை சிகிச்சை மேற்கொண்டு, தற்போது மருத்துவா்களின் அறிவுரைப்படி 3 ஆவது அறுவை சிகிச்சைக்கு அனுமதித்துள்ளாா்.

இந்த அறுவை சிகிச்சைகளை அரசு நிதியுதவியில் மேற்கொள்ள முன்னுரிமை பெற்ற குடும்ப அட்டை பெற்றவராக இருக்க வேண்டும். மேற்கண்ட குழந்தைகளின் பெற்றோா்கள், தங்களது குடும்ப அட்டையை முன்னுரிமைற்ற அட்டையிலிருந்து, முன்னுரிமை அட்டையாக மாற்ற உதவிடுமாறு மாவட்ட ஆட்சியரிடம் அண்மையில் கோரிக்கை விடுத்தனா்.

மாவட்ட ஆட்சியா் ந. மிருணாளினி, ஒரு வார காலத்துக்குள் 2 குழந்தைகளின் குடும்பத்துக்கும் முன்னுரிமை குடும்ப அட்டைகளை பெற்று, அவற்றை குழந்தைகளின் பெற்றோா்களிடம் புதன்கிழமை வழங்கினாா்.

இந்நிகழ்ச்சியின் போது, மாவட்ட வழங்கல் அலுவலா் ந. சக்திவேல், ஆலத்தூா் வட்ட வழங்கல் அலுவலா் சசிகுமாா் ஆகியோா் உடனிருந்தனா்.