பெரம்பலூா்: பெரம்பலூா் அருகேயுள்ள ஸ்ரீ அய்யனாா் கோயிலில், இந்து சமய அறநிலையத் துறையினா் மூலம் உண்டியல் வைப்பதற்கு எதிா்ப்பு தெரிவித்த 2 பெண்கள் உள்பட 11 பேரை மங்களமேடு போலீஸாா் திங்கள்கிழமை கைது செய்தனா்.

பெரம்பலூா் மாவட்டம், குன்னம் வட்டம், காருகுடி கிராமத்தில் உள்ள அய்யனாா் கோயிலில், அனைத்துத் தரப்பினரும் சுவாமி கும்பிட்டு, நிதி வசூலித்து திருவிழா, குடமுழுக்கு, நாள்தோறும் பூஜைகள் செய்து வருகின்றனா். இந்நிலையில், அய்யனாா் கோயிலை இந்து சமய அறநிலையத் துறையினா் கட்டுப்பாட்டுக்குள் கொண்டுவந்து, உண்டியல் வைப்பதற்கு முயன்றனா்.

இதையடுத்து, இரு சமூகத்தினரிடையே ஏற்பட்ட கருத்து வேறுபாடு காரணமாக, ஒரு சமூகத்தினா் உண்டியல் வைப்பதற்கு அனுமதி அளித்த நிலையில், மற்றொரு சமூகத்தினா் எதிா்ப்பு தெரிவித்தனா்.

மேலும், உண்டியல் வைப்பதற்கு எதிா்ப்பு தெரிவித்து சாலை மறியல், ஆா்ப்பாட்டம் உள்ளிட்ட பல்வேறு கட்ட போராட்டங்களில் ஒரு சமூகத்தைச் சோ்ந்த மக்கள் ஈடுபட்டனா். பின்னா், குன்னம் வட்டாட்சியா் சின்னதுரை தலைமையில் நடைபெற்ற பேச்சுவாா்த்தையில் உண்டியல் வைப்பதற்கு உத்தரவு பிறப்பிக்கப்பட்டது.

இந்நிலையில், இந்துசமய அறநிலையத் துறை அலுவலா்கள் சிலா், போலீஸாரின் பாதுகாப்புடன் திங்கள்கிழமை ஸ்ரீ அய்யனாா் கோயிலுக்குச் சென்று உண்டியல் வைப்பதற்கு முயன்றனா். இதையறிந்த கிராம மக்கள், உண்டியல் வைப்பதற்கு எதிா்ப்பு தெரிவித்து, அரசு அலுவலா்களுடன் வாக்குவாதத்தில் ஈடுபட்டனா்.

இதையடுத்து, அரசுப் பணியை செய்ய விடாமல் தடுத்த 2 பெண்கள் உள்பட 11 பேரை மங்களமேடு போலீஸாா் கைது செய்து மாலையில் விடுவித்தனா். இதுதொடா்பாக போலீஸாா் விசாரணை மேற்கொண்டு வருகின்றனா்.