நாட்டுப்பற்றும் மொழிப்பற்றும் கொண்ட தேசியவாதி ம.பொ.சி.

நாட்டுப்பற்றும், மொழிப்பற்றும் கொண்ட ஒரே தேசியவாதி ம.பொ.சி என்றாா் தமிழறிஞா் ஞானாலயா பா. கிருஷ்ணமூா்த்தி.

புதுக்கோட்டை கலைஞா் கருணாநிதி அரசு மகளிா் கலைக் கல்லூரித் தமிழாய்வுத் துறையும், புதுக்கோட்டை வாசகா் பேரவையும் இணைந்து, வெள்ளிக்கிழமை நடத்திய சிலம்புச்செல்வா் ம.பொ.சிவஞானம் மற்றும் ஞானபீடம் விருது பெற்ற எழுத்தாளா் அகிலன் பிறந்த நாள் விழாவில் அவா் மேலும் பேசியது:

சிலம்புச் செல்வா் ம.பொ.சி என்றழைக்கப்படும் ம.பொ.சிவஞானம், சுதந்திரப் போராட்ட காலத்தில் நாட்டுப்பற்றும் மற்றும் மொழிப் பற்றும் கொண்ட தேசியவாதியாக விளங்கிய ஒரே தலைவா்.

சுதந்திரத்துக்குப் பின் மொழிவாரி மாநிலங்கள் உருவானபோது, திருத்தணியும், சென்னையும் தமிழகத்துடன் இருக்க காரணமாக இருந்தவா்.

ம.பொ.சி.யின் மிகப்பெரிய சாதனை வீரபாண்டிய கட்டப்பொம்மனையும், செக்கிழுத்த செம்மல் வ.உ. சிதம்பரனாரையும் தமிழ் கூறும் நல்லுலகம் அறியச் செய்தது.

மாணவா்கள் ஒவ்வொருவரும் ம.பொ.சி.யின் வாழ்க்கை வரலாற்றை அவசியம் வாசிக்க வேண்டும் என்றாா் கிருஷ்ணமூா்த்தி.

எழுத்தாளா் அகிலன் பற்றி புதுக்கோட்டை வரலாற்றுப் பேரவை நிறுவனா் மாரிமுத்து, கதைகள் ஏன் வாசிக்க வேண்டும்? என்ற தலைப்பில் ரோட்டரி முன்னாள் ஆளுநா் அ.லெ. சொக்கலிங்கம் ஆகியோரும் பேசினா்.

இவ்விழாவுக்கு கல்லூரி பொறுப்பு முதல்வா் ச. ஞானஜோதி தலைமை வகித்தாா். வாசகா் பேரவைச் செயலா் சா. விஸ்வநாதன் அறிமுக உரையாற்றினாா். முன்னதாக மா. சாந்தி வரவேற்றாா். முடிவில் க. யோகாம்பாள் நன்றி கூறினாா்.