பணம் செலுத்தியும் இயந்திரம் வழங்க மறுத்த நிறுவனம் ரூ. 5 லட்சம் இழப்பீடு வழங்க உத்தரவு

பணம் செலுத்தியும் இயந்திரம் வழங்க மறுத்த சென்னையைச் சோ்ந்த தனியாா் நிறுவனம், ரூ. 5 லட்சம் இழப்பீடு வழங்க வேண்டும் என புதுக்கோட்டை மாவட்ட நுகா்வோா் குறைதீா் ஆணையம் உத்தரவிட்டுள்ளது.

புதுக்கோட்டை எஸ்எம் நகரைச் சோ்ந்தவா் எம். முகமது இப்ராஹிம். இவா் சென்னை அம்பத்தூரிலுள்ள ஒரு தனியாா் நிறுவனத்தில் சானிட்டரி நாப்கின் தயாரிக்கும் இயந்திரத்தை சுயதொழில் தொடங்கும் நோக்கில் வாங்க முற்பட்டாா்.

இதற்காக அந்த இயந்திரத்தின் மொத்த விலையான ரூ. 4.89 லட்சத்தில், கடந்த 2022 நவம்பா் 28ஆம் தேதி ரூ. 3.75 லட்சத்தை செலுத்தியுள்ளாா். 2023 ஜனவரி மாதம் இயந்திரம் அனுப்பி வைக்கப்படும் என்ற உத்தரவாதம் நிறைவேற்றப்படவில்லை.

அதன்பிறகு, இயந்திரத்தை அனுப்பிவைக்கக் கோரி பலமுறை அந்த நிறுவனத்துடன் பேசியுள்ளாா் இப்ராஹிம். ஒரு கட்டத்தில் பணத்தையாவது திரும்பத் தருமாறு கேட்டும் வழக்குரைஞா் மூலம் நோட்டீஸ் அனுப்பியுள்ளாா். ஆயினும் இயந்திரம் அனுப்பி வைக்கப்படவில்லை.

இதைத் தொடா்ந்து புதுக்கோட்டை மாவட்ட நுகா்வோா் குறைதீா் ஆணையத்தில் முகமது இப்ராஹிம் வழக்கு தொடா்ந்தாா். எதிா்தரப்பினரான அந்தத் தனியாா் நிறுவனத்தினா் இயந்திரத்தை இப்ராஹிம் பெற மறுத்து தகராறு செய்ததாகக் கூறினாலும், அதற்கான ஆவணங்கள், சாட்சிகள் எதையும் சமா்ப்பிக்கவில்லை.

இந்த நிலையில், குறைதீா் ஆணையத்தின் தலைவா் த. சேகா் வியாழக்கிழமை தீா்ப்பளித்தாா். ஆா்டா் செய்த சானிட்டரி நாப்கின் தயாரிக்கும் இயந்திரத்தை எந்த வித நிபந்தனையும் இன்றி உடனடியாக முகமது இப்ராஹிமுக்கு வழங்க வேண்டும். அல்லது, அவா் செலுத்திய ரூ. 3.5 லட்சத்தை, செலுத்தப்பட்ட தேதியிலிருந்து ஆண்டுக்கு 9% வட்டி சோ்த்து திரும்ப வழங்க வேண்டும்.

தனியாா் நிறுவனத்தினரின் சேவைக் குறைபாடு மற்றும் மன உளைச்சலுக்கு இழப்பீடாக, பாதிக்கப்பட்ட முகமது இப்ராஹிமுக்கு ரூ. 5 லட்சம் வழங்க வேண்டும். மேலும், வழக்குச் செலவுகளுக்காக ரூ. 10 ஆயிரம் வழங்க வேண்டும்.

தீா்ப்பின் நகல் கிடைத்த 45 நாள்களுக்குள் இவற்றை வழங்காவிட்டால், இயந்திரத்துக்கு செலுத்தப்பட்ட தொகை மற்றும் இழப்பீட்டுத் தொகை ஆகியவற்றுக்கு 12 சதவிகிதம் வட்டி சோ்த்து வழங்க வேண்டும் என்றும் அந்த உத்தரவில் குறிப்பிடப்பட்டுள்ளது.