காரைக்குடி-பட்டுக்கோட்டை வழித்தடத்தில் நிரந்தர ரயில் சேவை தொடங்க வலியுறுத்தல்

காரைக்குடி-பட்டுக்கோட்டை வழித்தடத்தில் நிரந்தர ரயில் சேவையை தொடங்க வேண்டுமென பட்டுக்கோட்டை ரயில் பயணிகள் நலச் சங்கம் வலியுறுத்தியுள்ளது.
இதுகுறித்து, அச்சங்கத்தின் தலைவர் என்.ஜெயராமன் தஞ்சை நாடாளுமன்ற உறுப்பினர் கு.பரசுராமனுக்கு அனுப்பியுள்ள மனு:
காரைக்குடி-பட்டுக்கோட்டை-திருவாரூர் மீட்டர்கேஜ் பாதையை அகல ரயில் பாதையாக மாற்றுவதற்காக 2012 ஆம் ஆண்டு ரயில் போக்குவரத்து நிறுத்தப்பட்டது.
இந்த வழித்தடத்தில் அகல ரயில்பாதை அமைக்கும் பணிகள் மிகவும் தாமதமாக தொடங்கிய நிலையில், தற்போது காரைக்குடி- பட்டுக்கோட்டை இடையே மட்டும் 75 கி.மீ. தொலைவுக்கு அகல ரயில் பாதை அமைக்கும் பணிகள் 2018 பிப்ரவரி மாதம் நிறைவடைந்தது.
பின்னர், பிப். 27, 28 மார்ச் 1 ஆகிய தேதிகளில் ரயில்வே பாதுகாப்பு ஆணையரின் சோதனைகளும், அதிகபட்சமாக 118 கி.மீ. வேகத்தில் சோதனை ஓட்டமும் நடைபெற்றது. இதைத் தொடர்ந்து மார்ச் 30 ஆம் தேதி ஒரு நாள் மட்டும் பயணிகள் ரயில் காரைக்குடி-பட்டுக்கோட்டை இடையே இயக்கப்பட்டது.
இதையடுத்து, தமிழ் புத்தாண்டான ஏப்.14 முதல் இவ்வழித்தடத்தில் நிரந்தர ரயில் சேவை தொடங்கும் என கூறப்பட்டது. ஆனால் அனைத்துப் பணிகளும் முடிவடைந்த பின்னரும் காரைக்குடி-பட்டுக்கோட்டை இடையே நிரந்தர ரயில் சேவை தொடங்காமல் ரயில்வே நிர்வாகம் காலம் தாழ்த்துவது இப்பகுதி மக்களை மிகவும் ஏமாற்றத்திற்கு உள்ளாக்கி இருக்கிறது.
இப்பகுதி முன்னேற்றத்திற்காக ரயில் சேவையை தாமதமின்றி தொடங்க ரயில்வே துறைக்கும், ரயில்வே அமைச்சகத்துக்கும் உரிய அழுத்தம் கொடுக்க வேண்டும்.
காரைக்குடி-பட்டுக்கோட்டை இடையே ரயில் சேவையைத் தொடங்கவும், நிலுவையில் உள்ள தஞ்சாவூர் - ஒரத்தநாடு - பட்டுக்கோட்டை ரயில் திட்டங்களையும், நில அளவு முடிந்து பணிகள் தொடங்கப்பட்ட மன்னார்குடி-பட்டுக்கோட்டை ரயில் திட்டத்தையும் உடனடியாக தொடங்க விரைந்து நடவடிக்கை எடுக்க வேண்டும் என மனுவில் தெரிவிக்கப்பட்டுள்ளது.