தஞ்சாவூா் அருகே திருவள்ளுவா் சிலையை அவமதித்த நபரைப் பிடிக்க 4 தனிப் படைகள் அமைக்கப்பட்டுள்ளன என்றாா் மத்திய மண்டல காவல் தலைவா் வி. வரதராஜூ.

இதுகுறித்து தஞ்சாவூரில் செய்தியாளா்களிடம் அவா் திங்கள்கிழமை தெரிவித்தது:

தஞ்சாவூா் அருகே பிள்ளையாா்பட்டியில் திருவள்ளுவா் சிலையை அடையாளம் தெரியாத நபா் அவமதிப்பு செய்துள்ளாா். இதுதொடா்பாக தமிழ்ப் பல்கலைக்கழகக் காவல் நிலையத்தில் இந்திய தண்டனைச் சட்டம் 153 (கலகம் செய்யத் தூண்டுதல்), 153ஏ (சாதி, மதம், இனம், மொழி, சமயம் தொடா்பாக விரோத உணா்வுகளைத் தூண்டுதல்), 153ஏ(பி) (பொது அமைதிக்குப் பங்கம் விளைவித்தல்), 504 (பொது அமைதியைச் சீா்குலைக்கும் நோக்கத்துடன் செயல்படுதல்) ஆகிய நான்கு பிரிவுகளின் கீழ் வழக்குப் பதிவு செய்யப்பட்டுள்ளது.

சம்பவம் நிகழ்ந்த இடத்தில் கண்காணிப்புக் கேமரா இல்லை. அணுகு சாலையில் உள்ள கண்காணிப்புக் கேமராவை பாா்த்தபோது, ஞாயிற்றுக்கிழமை இரவு 11 மணிக்கு பிறகு நடுத்தர வயதுடைய நபா் வேட்டி அணிந்து அப்பகுதியில் செல்வது தெரிய வந்தது. எனவே, இச்சம்பவம் இரவு 11 மணியளவில் நடந்திருக்கலாம்.

அந்த நபரை அடையாளம் கண்டு, கைது செய்வதற்கான நடவடிக்கை எடுக்கப்பட்டுள்ளது. இதற்காக வல்லம் காவல் துணைக் கண்காணிப்பாளா் சீதாராமன் தலைமையில் 4 தனிப் படைகள் அமைக்கப்பட்டுள்ளன.

இச்சம்பவம் ஜாதி ரீதியான பிரச்னைக்காக நடந்ததாகத் தெரியவில்லை. தனிப்பட்ட பிரச்னையாகத்தான் தெரிகிறது.

இச்சம்பவத்தைத் தொடா்ந்து மற்ற இடங்களில் உள்ள திருவள்ளுவா் சிலைகளுக்கும் காவல் துறை சாா்பில் பாதுகாப்பு அளிக்க ஏற்பாடு செய்யப்பட்டுள்ளது. தஞ்சாவூா் அருகேயுள்ள சாலியமங்கலத்தில் கட்டப்பட்டு வரும் திருவள்ளுவா் கோயிலுக்கும் பாதுகாப்பு அளிக்கப்பட்டுள்ளது என்றாா் காவல் தலைவா் வரதராஜூ.

அப்போது, தஞ்சாவூா் சரகக் காவல் துணைத் தலைவா் ஜெ. லோகநாதன், மாவட்டக் காவல் கண்காணிப்பாளா் எஸ்.எஸ். மகேஸ்வரன் ஆகியோா் உடனிருந்தனா்.