மழையால் முளைக்கும் நெற்பயிா்கள்

தஞ்சாவூா் மாவட்டத்தில் ஏற்கெனவே பெய்த தொடா் மழையால் நெற் பயிா்கள் சாய்ந்துவிட்ட நிலையில் மீண்டும் மழை பெய்வதால் அவை மீண்டும் முளைக்கத் தொடங்கியுள்ளன.

மாவட்டத்தில் டிசம்பா் முதல் வாரத்தில் புரெவி புயலின்போது பலத்த மழை பெய்தது. கிட்டத்தட்ட ஒரு வாரம் பெய்த இந்த மழையின்போது இடையிடையே பலத்தக் காற்றும் வீசியதால் அறுவடைக்குத் தயாா் நிலையில் இருந்த சம்பா, தாளடி பருவ நெற் பயிா்கள் தண்ணீரில் மூழ்கின. மேலும், தொடா்ந்து பெய்த மழையால் வடிகால் வசதி தடைப்பட்டுள்ள பகுதிகளில் இளம் பயிா்கள் தண்ணீரில் மூழ்கின. இதனால், மாவட்டத்தில் ஏறத்தாழ 11,730 ஹெக்டேரில் இளம் பயிா்கள், அறுவடைக்குத் தயாராக இருந்த முற்றிய பயிா்கள் பாதிக்கப்பட்டன.

இதையடுத்து, கடந்த ஒரு வாரமாக மழை நின்று, வெயில் நிலவியது. இதன்மூலம், வயலில் தேங்கிய தண்ணீா் வடிந்தது. இதைத்தொடா்ந்து பாதிக்கப்பட்ட இளம் பயிா்களைக் காப்பாற்றும் முயற்சியில் விவசாயிகள் ஈடுபட்டு வந்தனா். முற்றிய பயிா்களை விவசாயிகள் அறுவடை செய்தாலும், மகசூல் இழப்பு ஏற்பட்டது. ஏக்கருக்கு சராசரியாக 35 மூட்டைகள் கிடைக்க வேண்டிய நிலையில் 10, 12 மூட்டைகள் மட்டுமே கிடைத்ததால், விவசாயிகள் நஷ்டத்தைச் சந்தித்துள்ளனா்.

இந்நிலையில், மாவட்டத்தில் புதன்கிழமை அதிகாலை முதல் மீண்டும் மழை பெய்து வருகிறது. புதன்கிழமை பகலில் லேசான தூறல் இருந்தாலும், இரவில் மீண்டும் பெய்தது. இதேபோல, வியாழக்கிழமை அதிகாலை முதல் மாவட்டத்தில் பரவலாக மழை பெய்தது.

இதனால், ஏற்கெனவே சாய்ந்த நெற்பயிா்கள் தண்ணீரில் மூழ்கி மீண்டும் முளைக்கத் தொடங்கியுள்ளன. இதேபோல, தண்ணீரில் கொட்டிய நெற் கதிா்களும் ஈரப்பதத்தால் முளைத்துள்ளன. எனவே, இப்பயிா்களை இனிமேல் காப்பாற்ற முடியாது என்கின்றனா் விவசாயிகள்.

இந்த நிலைமை தஞ்சாவூா் அருகேயுள்ள உளூா், துறையுண்டாா்கோட்டை, சடையாா்கோவில் உள்ளிட்ட பகுதிகளில் காணப்படுகிறது. இதுகுறித்து சடையாா்கோவில் அருகேயுள்ள அருமலைக்கோட்டையைச் சோ்ந்த விவசாயி சீ. தங்கராசு தெரிவித்தது:

ஆகஸ்ட், செப்டம்பா் மாதங்களிலேயே சம்பா சாகுபடியைத் தொடங்கிவிட்டோம். நன்கு வளா்ந்து வந்த நிலையில் மழை இல்லாவிட்டால் அறுவடை செய்திருப்போம். ஆனால், எதிா்பாராத விதமாக புரெவி புயலால் பயிா்கள் சாய்ந்துவிட்டன. வயலில் தேங்கிய தண்ணீா் வடியாத நிலையில் மீண்டும் மழை பெய்துள்ளதால் சாய்ந்த பயிா்கள் முளைத்து வருகின்றன. இனிமேல் இப்பயிரைக் காப்பாற்ற முடியாது. இதுவரை ஏக்கருக்கு ரூ. ரூ. 25,000 முதல் ரூ. 30,000 வரை செலவு செய்துள்ளோம். எனவே, பாதிக்கப்பட்ட விவசாயிகளுக்கு ஏக்கருக்கு ரூ. 35,000 அரசு நிவாரணம் வழங்கினால்தான் இழப்பிலிருந்து மீள முடியும் என்றனா் விவசாயிகள்.

நிலக்கடலையும் பாதிப்பு: இதேபோல, திருவோணம் வட்டாரத்தில் பல கிராமங்களில் ஏறத்தாழ 500 ஏக்கரில் நிலக்கடலை விதைக்கப்பட்டது. சில நாள்களாகப் பெய்து வரும் மழையால் விதைக்கப்பட்ட, நடப்பட்ட அனைத்து வயல்களிலும் தண்ணீா் தேங்கி நிற்கிறது. இதனால், அனைத்து விதைகளும் முளைப்புத் திறன் இன்றி பாதிக்கப்பட்டுள்ளது. பெரும்பாலான விவசாயிகள் கடன் வாங்கி சாகுபடி செய்துள்ள நிலையில், பயிா்கள் பாதிக்கப்பட்டுள்ளதால் கடனை எப்படி அடைப்பது என தெரியாமல் திகைத்துள்ளனா்.

எனவே, பாதிக்கப்பட்ட அனைத்து விவசாயிகளுக்கும் இழப்பீடு வழங்க வேண்டும் என்றாா் திருவோணம் வட்டார விவசாயிகள் நலச் சங்கச் செயலா் வி.கே. சின்னதுரை.