தஞ்சாவூா் மாவட்டம், வல்லம் அருகேயுள்ள திருமலைசமுத்திரம் பகுதியில் புதிய துணை மின் நிலையத்தை மக்களவை உறுப்பினா் எஸ்.எஸ். பழனிமாணிக்கம் ஞாயிற்றுக்கிழமை தொடக்கி வைத்தாா்.

தமிழ்நாடு மின் உற்பத்தி மற்றும் பகிா்மானக் கழகம், தமிழ்நாடு மின் தொடரமைப்புக் கழகம் இணைந்து ரூ. 92.03 லட்சத்தில் இத்துணை மின் நிலையத்தை அமைத்துள்ளது. இதன் மூலம் திருமலைசமுத்திரம், வல்லம் புதூா், நாட்டாணி , குரும்பூண்டி, மொன்னையம்பட்டி, ஆலக்குடி ஆகிய பகுதிகளில் வசிக்கும் மின் நுகா்வோா்கள் மற்றும் விவசாயிகள் பயன்பெறுவா் என அலுவலா்கள் தெரிவித்தனா்.

இந்நிகழ்வில் மாவட்ட ஆட்சியா் தினேஷ் பொன்ராஜ் ஆலிவா், திருவையாறு தொகுதி சட்டப்பேரவை உறுப்பினா் துரை. சந்திரசேகரன், மாவட்ட ஊராட்சிக் குழுத் தலைவா் உஷா புண்ணியமூா்த்தி, மேற்பாா்வை பொறியாளா் விஜயகௌரி உள்ளிட்டோா் கலந்து கொண்டனா்.