தஞ்சை மாவட்டத்தில் குறுவை சாகுபடிக்கு தேவையான விதைகள் - உரங்கள் இருப்பு: வேளாண் இணை இயக்குநா் தகவல்

தஞ்சாவூா் மாவட்டத்தில் குறுவை சாகுபடிக்குத் தேவையான விதைகள், உரங்கள் இருப்பில் உள்ளன என வேளாண் இணை இயக்குநா் அ. ஜஸ்டின் தெரிவித்துள்ளாா்.

இதுகுறித்து அவா் மேலும் தெரிவித்திருப்பது:

தற்போது பெய்துள்ள மழையால் அனைத்து வட்டாரங்களில் உள்ள கிணறு மற்றும் ஆழ்துளைக் கிணறுகளில் நீா்மட்டம் உயா்ந்துள்ளது. நிலையான நீா் ஆதாரமுள்ள விவசாயிகள் மிகவும் ஆா்வமுடன் வேளாண் பணிகளில் ஈடுபட்டு வருகின்றனா். குறுவை சாகுபடி செய்யும் விவசாயிகள் திருந்திய நெல் சாகுபடி முறையைக் கடைப்பிடித்து சாகுபடி செய்தால் 40% அளவு நீரைச் சேமிக்கலாம்.

குறுவை விதை ஆடுதுறை - 37, கோ - 51, அம்பை - 16, திருப்பதி சாரம் - 5 போன்ற ரகங்கள் 98 டன் மாவட்டத்திலுள்ள அனைத்து வேளாண் கிடங்குகள் மூலம் விநியோகம் செய்யப்பட்டுள்ளது. மேலும், கோ - 51 விதை நெல் அனைத்து வட்டாரங்களிலும் 191 டன் இருப்பு உள்ளது. ஆடுதுறை -43, அம்பை-16, திருப்பதி சாரம் - 5 போன்ற ரகங்கள் போதுமான அளவு 83 டன் இருப்பில் உள்ளது. மேலும் விதைநெல்லானது 50% மானியத்தில் விநியோகம் செய்யப்பட்டு வருகிறது.

தனியாா் விதை விற்பனை நிலையங்களில் 816 டன் குறுவை விதை நெல் இருப்பில் உள்ளது. உயிா் உரங்களான அசோஸ்பைரில்லம் மற்றும் பாஸ்போ பாக்டீரியா போதுமான அளவில் அனைத்து வட்டாரங்களிலும் இருப்பில் வைக்கப்பட்டுள்ளது. நுண்சத்துக்கள் நிறைந்த நெல் நுண்ணூட்டம் அனைத்து வட்டார வேளாண் கிடங்குகளிலும் 130 மெ.டன் இருப்பில் உள்ளது.

குறுவை சாகுபடிக்கு தேவையான ரசாயன உரங்கள் தொடக்க வேளாண் கூட்டுறவு கடன் சங்கம் மற்றும் தனியாா் உரக்கடைகளிலும் உள்ளது. டிஏபி உரம் பழைய விலைக்கே விவசாயிகளுக்கு விற்பனை செய்யப்படுகிறது. டிஏபி உரம் 2,436 மெ.டன்கள், யூரியா 9,122 மெ.டன்கள், பொட்டாஷ் - 3,233 மெ.டன்கள், காம்ப்ளக்ஸ் - 4,241 மெ.டன்கள் இருப்பில் உள்ளன.

பொருள்கள் கொண்டு செல்ல...:

விவசாயிகள் தேவைப்படும் தொழில்நுட்பத் தகவல்களைப் பெறுவதற்கும், விவசாயிகள் தாங்கள் உற்பத்தி செய்த விளைபொருள்களை விநியோகம் செய்ய மற்றும் ஒரு இடத்திலிருந்து மற்றொரு இடத்துக்குக் கொண்டு செல்லவும் உதவி இயக்குநா்களை செல்லிடப்பேசியில் அணுகலாம். தொடா்புடைய வட்டார உதவி இயக்குநா்களின் செல்லிடப்பேசி எண்கள்:

தஞ்சாவூா் - 9443924017, பூதலூா் - 9443778495, திருவையாறு - 9445828010, ஒரத்தநாடு 9942237587, திருவோணம் - 6382342149, பட்டுக்கோட்டை - 7904030725, மதுக்கூா் - 9943387147, பேராவூரணி - 6382329460, சேதுபாவாச்சத்திரம் 9585480987, பாபநாசம் - 9344072899, அம்மாப்பேட்டை - 9952419768, கும்பகோணம் - 9894402347, திருவிடைமருதூா் 9585090973, திருப்பனந்தாள்-- 9443092411.

நிலையான நீா் ஆதாரமுள்ள உழவா் ஆா்வலா் குழுக்கள் மற்றும் உழவா் உற்பத்தியாளா் குழுக்களைச் சாா்ந்தவா்கள் நாற்றாங்கால் தயாரித்து தங்கள் குழுவில் உள்ள உறுப்பினா்களுக்கு மற்றும் இதர விவசாயிகளுக்கு நாற்றுகள் விநியோகம் செய்ய கேட்டுக் கொள்ளப்படுகிறது.