நகா்ப்புற உள்ளாட்சித் தோ்தலில் தனித்து போட்டியிட தொண்டா்கள் கருத்து: பாஜக மாநிலப் பொதுச் செயலா்

நகா்ப்புற உள்ளாட்சித் தோ்தலில் பாஜக தனித்துப் போட்டியிட கணிசமான தொண்டா்கள் கருத்து தெரிவித்துள்ளனா் என்றாா் அக்கட்சியின் மாநிலப் பொதுச் செயலா் இராம. சீனிவாசன்.

தஞ்சாவூரில் நகா்ப்புற உள்ளாட்சித் தோ்தலில் பாஜக சாா்பில் போட்டியிட விருப்பம் உள்ளவா்களிடமிருந்து விருப்ப மனு பெறும் நிகழ்ச்சி வெள்ளிக்கிழமை நடைபெற்றது. இதில், பங்கேற்ற இராம. சீனிவாசன் பின்னா் செய்தியாளா்களிடம் தெரிவித்தது:

நகா்ப்புற உள்ளாட்சித் தோ்தலுக்கு பாஜக தயாராகிவிட்டது. இதற்கான விருப்ப மனு பெறும் பணி நவ. 26 ஆம் தேதி வரை நடைபெறுகிறது. இத்தோ்தலை வலிமையுடனும், தன்னம்பிக்கையுடனும் சந்திக்க உள்ளோம்.

தமிழகத்தில் தொண்டா்களுடன் மேற்கொள்ளப்பட்ட பல்வேறு கலந்துரையாடலின்போது, நகா்ப்புற உள்ளாட்சி தோ்தலில் பாஜக தனித்து போட்டியிட்டு, கட்சியின் வலிமையைப் பொதுமக்களுக்குப் புரிய வைக்க வேண்டும். எனவே, நகா்ப்புற உள்ளாட்சி தோ்தலில் எந்தக் கட்சியுடனும் கூட்டணி வேண்டாம் என்கிற கருத்து தொண்டா்களிடையே கணிசமாக உள்ளது. இதேபோல, கூட்டணி வேண்டும் என்ற கருத்தையும் தெரிவிக்கின்றனா். இதை நாங்கள் உரிய முறையில் மாநிலத் தலைவரிடம் கூறுவோம். ஆனால், பாஜக கட்டுப்பாடான கட்சி என்பதால், மாநிலத் தலைவா் என்ன இறுதி முடிவு எடுக்கிறாரோ, அதை எல்லோரும் ஏற்றுக் கொள்வோம். கூட்டணி வேண்டுமா, வேண்டாமா என்பதை மாநிலத் தலைவா் முடிவு செய்வாா்.

கால அவகாசம் தேவை: வேளாண் சட்டங்களைப் பொருத்தவரை பாஜக செய்தது தவறு என்பதாக இதுவரை நினைக்கவில்லை. சரியானது என்றுதான் நினைத்துக் கொண்டிருக்கிறோம். வேளாண் சட்டம் குறித்து புரிதலை கொண்டு வர இன்னும் கால அவகாசம் வேண்டும் என்பதால், தற்போது திரும்பப் பெற்றுள்ளோம். சட்டங்கள் தவறு என்பதால் அல்ல. இதை வாய்ப்பாகப் பயன்படுத்தி காங்கிரஸ், திமுக, கம்யூனிஸ்ட் கட்சிகள் தேசத்தில் மக்களிடம் பிளவு மனபான்மையை உருவாக்கி வருகின்றனா். விவசாயிகள் வேளாண் சட்டத்தை முழுமையாகப் புரிந்து கொண்ட பிறகு, விவசாயிகள் கூறிய திருத்தங்களுடன் மீண்டும் அமல்படுத்தப்படும் என்றாா் சீனிவாசன்.

இந்நிகழ்ச்சியில் பாஜக தேசியப் பொதுக் குழு உறுப்பினா் எம்.எஸ். ராமலிங்கம், மாநிலத் துணைத் தலைவா் கருப்பு எம். முருகானந்தம், மாவட்டத் தலைவா் ஆா். இளங்கோ, பொதுச் செயலா் பி. ஜெய்சதீஷ் உள்ளிட்டோா் கலந்து கொண்டனா்.