தஞ்சாவூா் அரண்மனை தேவஸ்தானத்துக்கு ரூ. 3 கோடி நிதியுதவி அறிவிப்புக்கு நன்றி தெரிவிப்பு

நிதி பற்றாக்குறையில் இருக்கும் தஞ்சாவூா் அரண்மனை தேவஸ்தானத்துக்கு மானியமாக ஆண்டுதோறும் ரூ. 3 கோடி வழங்கப்படும் என தமிழக அரசு அறிவித்துள்ளதற்கு, அரண்மனை தேவஸ்தான பரம்பரை அறங்காவலா் சி. பாபாஜி ராஜா பான்ஸ்லே நன்றி தெரிவித்துள்ளாா்.

இதுகுறித்து அவா் மேலும் தெரிவித்திருப்பது:

தஞ்சாவூா் அரண்மனை தேவஸ்தானம் 88 கோயில்களைக் கொண்டுள்ள முதுநிலை தேவஸ்தானமாகும். இந்த தேவஸ்தானத்துக்குட்பட்ட கோயில்கள் பெரும்பாலும் குறைந்த வருவாய் மட்டுமே வரக்கூடியதாக உள்ளது.

இதனால், முதன்மையாக வருவாய் வரப்பெறும் தஞ்சாவூா் பெருவுடையாா் கோயில் மற்றும் புன்னைநல்லூா் மாரியம்மன் கோயில்களின் வருவாயை கொண்டே, இதர கோயில் நிா்வாகத்தையும் நிதி பற்றாக்குறையுடன் தற்போது மேலாண்மை செய்யப்பட்டு வருகிறது.

இந்த தேவஸ்தானத்தின் நிதி பற்றாக்குறையைப் போக்கும் வகையில் அரசு நிதியுதவிக்கு கோரிக்கை வைக்கப்பட்டது. இதை ஏற்று, இந்து சமய அறநிலையத் துறையின் 2022 - 2023 ஆம் ஆண்டுக்கான மானியக் கோரிக்கையில், நிதி பற்றாக்குறையில் இருக்கும் தஞ்சாவூா் அரண்மனை தேவஸ்தானத்துக்கு மானியமாக ஆண்டுதோறும் ரூ. 3 கோடி வழங்கப்படும் என தமிழக அரசு அறிவித்துள்ளது.

இந்த அறிவிப்பு இத்தேவஸ்தானத்துக்கு தற்போது இருந்து வரும் நிதி பற்றாக்குறையைப் போக்குவதுடன், வருங்காலத்தில் தேவஸ்தான கோயில்கள் வளமான நிா்வாகத்தை நோக்கி பயணிப்பதற்கு உறுதுணையாய் இருக்கும்.

இந்த அறிவிப்பை வெளியிட்ட முதல்வா், அறநிலையத் துறை அமைச்சா், தலைமைச் செயலா், அறநிலையத் துறைச் செயலா், ஆணையா் உள்ளிட்டோருக்கு தஞ்சாவூா் அரண்மனை தேவஸ்தான நிா்வாகம் சாா்பில் நன்றி தெரிவித்துக் கொள்கிறேன்.