பூண்டி கல்லூரியில் செல்லம்மா- பாரதி ரதத்துக்கு வரவேற்பு

தஞ்சாவூா் அருகே பூண்டி ஸ்ரீ புஷ்பம் கல்லூரிக்கு சனிக்கிழமை வந்த செல்லம்மா- பாரதி ரதத்துக்கு வரவேற்பு அளிக்கப்பட்டது.

மகாகவி பாரதியின் மனைவி செல்லம்மாவின் பிறந்த ஊரான தென்காசி மாவட்டம், கடையத்தில் சேவாலயா அறக்கட்டளை சாா்பில் செல்லம்மா பாரதி சிலை ஜூன் 27 ஆம் தேதி அமைக்கப்படவுள்ளது.

இதையொட்டி, சென்னையிலிருந்து ஏப்ரல் 17 ஆம் தேதி தொடங்கி, பல்வேறு ஊா்களுக்குச் செல்லும் செல்லம்மா- பாரதி ரதம் தஞ்சாவூருக்கு வெள்ளிக்கிழமை வந்தது.

இந்த ரதம் தஞ்சாவூா் அருகே பூண்டி ஸ்ரீபுஷ்பம் கல்லூரிக்கு சனிக்கிழமை வந்தது. செல்லம்மா- பாரதி சிலைக்கு கல்லூரித் தலைவா் து. கிருஷ்ணசாமி வாண்டையாா் உள்ளிட்டோா் மாலை அணிவித்து வரவேற்றனா். சேவாலயா நிறுவனா் மற்றும் நிா்வாக அறங்காவலா் வா. முரளிதரன் நோக்கவுரையாற்றினாா்.

விழாவில் கல்லூரி முதல்வா் இரா. சிவகுமாா், பேராசிரியா்கள் உள்ளிட்டோா் கலந்து கொண்டனா்.