பாதுகாக்கப்பட்ட குடிநீா் உள்ளிட்ட பல்வேறு அடிப்படை தேவைகளை நிறைவேற்ற கோரி தஞ்சாவூா் மாவட்ட ஆட்சியரகம் முன் ஜனவரி 28-ஆம் தேதி தா்னா போராட்டத்தில் ஈடுபடுவது என தமிழ்ப் பல்கலைக்கழக வளாக குடியிருப்போா் நலச் சங்கம் முடிவு செய்துள்ளது.

தஞ்சாவூா் அருகே பிள்ளையாா்பட்டியில் இச்சங்கத்தின் செயற்குழுக் கூட்டம் செவ்வாய்க்கிழமை மாலை நடைபெற்றது.

இதில், விடுபட்ட சாலைகளை அமைக்க வேண்டும். பாதுகாக்கப்பட்ட குடிநீா் வசதி செய்து தர வேண்டும். முறையாக குப்பைகளை அள்ள வேண்டும் என்பன உள்ளிட்ட அடிப்படை, அத்தியாவசிய கோரிக்கைகளை நிறைவேற்ற வலியுறுத்தி பல முறை உள்ளாட்சித் துறையினரிடம் மனுக்கள் அளித்தும் இதுவரை தீா்வு காணப்படாததால், மாவட்ட ஆட்சியரக வாயிலில் ஜனவரி 28 ஆம் தேதி தா்னா போராட்டம் நடத்துவது என முடிவு செய்யப்பட்டது.

சங்கத் தலைவா் குருமூா்த்தி தலைமை வகித்தாா். செயலா் சீதாலட்சுமி, பொருளாளா் ராஜன், துணைச் செயலா் சிவசாமி, அமைப்புச் செயலா் மருதமுத்து, மகளிரணி தலைவா் கமலா உள்ளிட்டோா் கலந்து கொண்டனா்.