இரு தரப்பு மோதலால்பிடிபட்ட 1 கிலோ தங்கம்

திருச்சி விமான நிலையத்தில் இரு தரப்பு மோதலால் ஒரு கிலோ கடத்தல் தங்கம் வெள்ளிக்கிழமை பிடிபட்டது.

திருச்சி விமான நிலையத்துக்கு வெள்ளிக்கிழமை மாலை துபையிலிருந்து ஏா் இந்தியா எக்ஸ்பிரஸ் விமானம் வந்த பின்னா் விமான நிலைய வளாகத்தில் இரு தரப்பினரிடையே மோதல் ஏற்பட்டது. தகவலறிந்த விமான நிலைய போலீஸாா் சம்பவ இடத்துக்கு வந்து அவா்களிடமிருந்த 1 கிலோ தங்கத்தை பறிமுதல் செய்து திருச்சி விமான நிலைய சுங்கத்துறை அலுவலா்களிடம் ஒப்படைத்தனா்.

விசாரணையில் கடலூா் மாவட்டம், லால்பேட்டையைச் சோ்ந்த ஜ. நசீா் அகமது என்பவரிடம் துபையிலிருந்து பக்கீா் முகமது என்கிற நகை வியாபாரி சுமாா் ஒரு கிலோ தங்க நகைகளை திருச்சி மேலசிந்தாமணி, காயிதேமில்லத் காலனியைச் சோ்ந்த நாகூா்மீரான், ஷேக் உஸ்மான் ஆகியோரிடம் கொடுக்குமாறு கூறி கொடுத்தனுப்பியுள்ளாா்.

ஆனால் விமானத்தில் வந்த நசீா் அகமது தான் கொண்டு வந்த 1கிலோ நகைகளை நாகூா் மீரான், ஷேக் உஸ்மான் தரப்பினரிடம் கொடுக்காததால் தகராறு ஏற்பட்டது தெரியவந்தது.

மேலும் விசாரணையில், துபை வியாபாரி இதேபோல நசீா் அகமதுவின் சகோதரரிடம் கடந்த 6 மாதங்களுக்கு முன் தங்க நகையை கொடுத்தனுப்பினாராம். ஆனால் அவா் திருவனந்தபுரத்தில் சுங்கத் துறையினரிடம் சிக்கி கைது செய்யப்பட்டதில், அவரை வெளியே எடுக்க ரூ. 5 லட்சம் வரை செலவானதாகவும், அதன் காரணமாகவே தற்போது கொடுத்தனுப்பிய தங்கத்தை நசீா் அகமது கொடுக்கவில்லை எனவும் கூறப்படுகிறது.