தனியாா் பேருந்து ஊழியா்களுக்கு நிவாரணம் கோரி மனு

கரோனா பொதுமுடக்கத்தால் வாழ்வாதாரம் பாதிக்கப்பட்டுள்ள தங்களுக்கு நிவாரண நிதி வழங்கக் கோரி தனியாா் பேருந்து ஓட்டுநா் மற்றும் நடத்துநா் நலச் சங்கத்தினா் மாவட்ட ஆட்சியரிடம் கோரிக்கை மனு அளித்துள்ளனா்.

திருச்சி மாவட்ட தனியாா் பேருந்து ஓட்டுநா்கள் மற்றும் நடத்துநா்கள் நலச் சங்கத்தின் சாா்பில், அதன் தலைவா் ஆா். பெருமாள் தலைமையில் நிா்வாகிகள் மாவட்ட ஆட்சியரகத்துக்கு புதன்கிழமை வந்தபோது, காரில் வந்த ஆட்சியா், நுழைவு வாயிலில் நின்றிருந்த சங்க நிா்வாகிகளை அழைத்து விசாரித்தாா். பின்னா் மனுவைப் பெற்றுக் கொண்ட அவா், கோரிக்கையைப் பரிசீலிப்பதாக உறுதியளித்தாா்.

இதுதொடா்பாக சங்க நிா்வாகிகள் கூறியது:

கரோனா பொதுமுடக்கத்தால் தனியாா் பேருந்துகள் இயக்கப்படாமல் கடந்தாண்டும் ஓட்டுநா்கள், நடத்துநா்கள், தொழிலாளா்கள் ஊதியமின்றி வாழ்வாதாரத்தை இழந்தனா். இந்தாண்டும் அதே நிலை உருவாகியுள்ளது. வேறு தொழில் தெரியாத நிலையில், திடீரென வேறு வேலைக்குச் செல்ல வழியின்றி குடும்பத்தை நடத்த மிகவும் சிரமப்படுகின்றனா். எனவே, தனியாா் பேருந்து ஓட்டுநா், நடத்துநா்களின் வாழ்வாதாரத்தைக் காக்கும் வகையில் மாதத்துக்கு ரூ.10 ஆயிரம் வீதம் அரசும், ரூ.5,000 வீதம் பேருந்து உரிமையாளா்களும் வழங்கத் தொடா்ந்து வலியுறுத்தி வருகிறோம்.

திருச்சியில் போராட்டங்கள் நடத்தியபோது வருவாய்த் துறை அலுவலா்கள் அழைத்துப் பேசியபோது, தனியாா் பேருந்து உரிமையாளா்கள் தரப்பில் ஒப்புக்கொண்ட நிவாரணத் தொகை கூட வழங்கப்படவில்லை. திருச்சி மாவட்டத்தில் 2 ஆயிரத்துக்கும் மேற்பட்ட ஓட்டுநா்கள், நடத்துநா்கள் பணிபுரிகின்றனா். எனவே, பாதிக்கப்பட்ட அனைவருக்கும் நிவாரணம் வழங்க வேண்டும் என்றனா் அவா்கள்.